سانہوں مُڑ جھولی وچ پا مائے ۔۔۔ نجم الحسنین حیدر
سانہوں مُڑ جھولی وچ پا مائے
( نجم الحسنین حیدر )
اساں جندڑی پیتی، ہار گئے
سانہوں ساک یزیدی مار گئے
ساڈے موسم زہری ہو گئے نی
ساڈے پنڈے، بستی ناگاں دی
ساڈی روح سڑکاں وچکار پھسی
سانہوں سُرت رہی نہ راگاں دی
تاھیوں ٹنگدی پھرے ہوا مائے
سانہوں مُڑ جھولی وچ پا مائے
اساں رب دے وی کم کاج دے نہیں
اساں ب چوں الفاں چھو بیٹھے
توں چاھندی سی ایہہ ناں ہووے
اساں عشق دے کافر ہو بیٹھے
ساتھوں ڈردی پھرے دعا مائے
سانہوں مُڑ جھولی وچ پا مائے
اساں جندڑی پیتی، ھار گئے
سانہوں ساک یزیدی مار گئے
Facebook Comments Box