کھیچل تاں ہو سی ۔۔۔ فائزہ
کھیچل تاں ہوسی
فائزہ
کھیچل تاں ہوسی
ہک درخاست لکھوینی اے باجی
چُوہڑی دی سامی اے
انگریزی سکول وچ
گل اجیہی جوڑیا جے
کلیجہ پھڑیجے اگلیاں دا
دسیا جے
بالاں دے ڈھڈ پیندی کھوہ
ماواں توں جھلنی اوکھی
تتی واء وچ سڑنی آں
اوہناں کیتے
پر اوہلا رکھنا پوسی
اوہلا رکھیا جے
جُوں
بندہ میرا پیراں بھار کھلو نہیں سکدا
پُلس دا پِنجیا
بنا دو کوئی بات اچرج
مینوں سُو ڈھدے وتن
مُل تے پینا تہاڈے لکھن دا
اسیں کیہ، ساڈی ہستی کیہ
دو گرانہیاں تُکر
تسلا کرایا جے میرے ولوں
کم کریساں حدوں ودھ
کائی گھاٹا کائی تھوڑ
نہ ہو سی محنت دی
سارے کم مکا چلی آں
گند ہونجھ کے پوچی لا چلی آں
آکھو تاں آٹا وی گُنھی جاواں باجی ؟
Facebook Comments Box