اپریشن ۔۔۔ صابر علی صابر

اپریشن

صابر علی صابر

اک سرکاری چینل دی کندھ نال فٹ پاتھ توں سہکدی ہوئی اِل اپنا چوکھی مڑی ہوئی چنجھ والا مونھ پراں وچ لکاون دی ناکام کوشش کر رہی سی کہ کولوں لنگھدے ہوئے اک پاگل نے ویکھ لیا۔

منٹ کو بڑے گوہ نال ویکھدا رہیا۔ فیر بروٹے چک کے مونہہ سواردا تے سر ہلاوندا اوہدے کول ای بہہ گیا جیویں کوئی سوادی شئے لبھ گئی ہووے۔

دس کو کرماں دور چینل دے گیٹ اگے کھلوتا چٹیان مڈھاں والیاں کالیاں مچھاں والا سکورٹی گارڈ بڑی شرارتی جیہی نظر نال اہنہوں ویکھ رہیا سی۔ پر پاگل تے پاگل ہوندا اے۔ اوہنوں کیہہ لگے کوئی کسراں ویکھے۔

کندھ ولوں کالیاں پیراں والیاں ککیاں کیڑیاں دی اک قطار اِل ول آ رہی سی، جد کہ وگدی سڑک ولوں کالیاں کیڑیاں بڑی بے ترتیبی نال آ جا رہیاں سن۔

ایہناں کنک ونیاں کالیاں کیڑیاں چوں کجھ قد توں وڈے سراں والیاں اِل نوں چمبڑیاں ویکھ کے پاگل نے مونہہ پرے نوں کر لیا۔

کول ای قلفی دا اک تیلا پیا ہویا سی جیہنوں بڑیاں لسیاں تے مسکین جیہاں گوڑھے کالے رنگ دیاں کیڑیاں چمبڑیاں ہایاں سن۔

اوہنے اک ہوکا بھردیاں ہویاں اوس تیلے نوں ہتھ لایا ۔۔۔ تیلا ہلیا تے سستی دیاں ماریاں کیڑیاں نے بنا کسے ضد یا احتجاج دے اوہنوں چھڈ دتا، جیویں ایہدے وچ ای رب دی رضا سمجھ رہیاں ہون۔

اوہنے او تیلا پھڑ لیا تے دو چار صحت مند کیڑیاں توں اڈ باقی ساریاں ایدھر اودھر بھجن دی بجائے تیلے والی تھاں چٹن لگ پیئاں تے اوہنے اوہناں دی ایس حرکت توں مایوس ہوکے اِل ول مونہہ کر لیا۔

تیلے نال ہلا جلا کے ویکھنا چاہندا سی پر ککیاں تے وڈے سراں والیاں کیڑیاں توں ڈر گیا جیہڑیاں اوہدے تے پہرہ دے رہیاں سن۔ اتوں رنگ برنگے سراں والیاں مکھیاں اوہناں دے نال نال انج بھُوں بھُوں کر رھیاں سن۔ جیویں اوہناں نوں ہلا شیری دے رہیاں ہون۔ اگوں اوہناں دا رویہ وی سکیاں مانواں دھیاں والا ای لگ رہیا سی۔

دوجے پاسے کالیاں کیڑیاں ال ول آ جا تے رہیاں سن پر ایہہصرف گونگلواں توں مٹی جھاڑن والی گل سی۔

کجھ بادامی رنگ دیاں کیڑیاں کالیاں کیڑیاں دے ٹولے لے کے اگانہہ ودھ دیاں پر رنگ برنگیاں سراں والیاں مکھیاں تے ککیاں کیڑیاں اگے آ جاندیاں تے کوئی نہ کوئی سمجھوتا ہو جاندا۔ بتھیرا چر انج ہوندا رہیا۔ فیر لہندے ولوں اوپرے جیہے ڈھنگ دیاں کجھ بگیاں کیڑیاں آوندیاں دسیاں۔ وڈے سراں والیاں تے ککیاں کیڑیاں نے اگلوانڈی ہو کے جی آیاں نوں آکھیا تے اوہناں نوں ال کول لے آیئاں۔

جھٹ کو معائنہ کرن پچھوں بگیاں تے ککیاں تے وڈے سراں والیاں کیڑیاں نال وکھ وکھ میٹنگاں کیتیاں۔ جیہدے نتیجے اچ اوہناں دے مونہہ تے اک ڈونگھی جیہی مسکان آ گئی۔ جد کہ بگیاں کیڑیان کسے کامیاب ہون والے کھڈاری طرحاں جدھروں آیئاں سی اودھر ای پرت گیئاں۔

ایہہ ویکھ کے رنگ برنگ سراں والیاں مکھیاں نے رولا پا دتا تے کالیاں کیڑیاں ڈوریاں وانگوں اک دوجی دے مونہہ ول ویکھ ویکھ کے پریشان ہون لگ پیئاں۔

مکھیاں دا رولا سن کے ککیاں تے وڈے سراں والیاں کیڑیاں نے اوہناں نال اک لمی میٹنگ کیتی۔ میٹنگ مکی تے مکھیاں اندروں اندری انج خوش سن جیویں کوئی گُڑ دا ڈھیر لبھ گیا ہووے۔ پر دوجے پاسے کالیاں کیڑیاں دی حالت میلے وچ گواچے ہوئے اوس یتیم بال ورگی سی جیہنوں کوئی انگلے لاون نوں تیار نہیں ہوندا۔

ایہہ ویکھ کے پاگل دی چیک نکل گئی۔

ککیاں، کالیاں، وڈے سراں والیاں تے سب توں لسیاں چوکھیاں کالیاں کیڑیاں اتے مکھیاں توں اڈ اِل نے اوہدے ول ویکھیا پر کسے نیں وی اوہدا کوئی اثر نہ لیا۔

جیویں آکھ رہیاں ہون    ” پاگل اے “

Facebook Comments Box

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Calendar

March 2024
M T W T F S S
 123
45678910
11121314151617
18192021222324
25262728293031