تولیہ ۔۔۔ صابر علی صابر

تولیہ

صابر علی صابر

چھٹی توں گھنٹہ کو مگروں دفتر دے کمرے دی اندروں لگی کنڈی باہر دے 45 ڈگری نوں منہ چڑھا رہی سی کہ نکر چوں یو پی ایس دی نکی جہی چیک نال بجلی دا نظام بدل گیا۔ اے سی بند ہو گیا جدکہ ٹی وی تے اک انرجی سیور نے ایس تبدیلی دا کوئی اثر نہ لیا۔ تن انرجی سیور بجھن نال کمرے دا چانن گزارے جوگا رہ گیا تے ٹی وی چ جدید موسیقی تے ڈانس دے جھٹکیاں نال بدلدے ہوۓ رنگ برنگے چانن بھرے سین کمرے دی فضا تے اپنا چوکھا اثر چھڈن لگ پئے۔

انج اچی کرکے کندھ نال لگی قائد اعظم دی فوٹو تے اک تجریدی پینٹنگ سمیت تقریباً ہر چیز دا اک رنگ آوندا سی تے اک جاندا سی۔ جوانی دے کلینڈر دیاں آخری تاریخاں چ کھلوتا اپنے توں چٹی شلوار والا گلوں ننگا جنا اٹیچ باتھ چوں کنک رنگے تولیے نال ہتھ پونجھدا ہویا نکلیا تے چٹی چادر چڑھے ریکسین دے صوفے تے بہہ گیا۔

ادھا کو گھنٹہ پہلوں آئی کڑی آخری دو کپڑیاں چ اوہدے سجے پاسے دوجے صوفے تے اوہدے ول لتاں لمیاں کرکے ٹیڈھی پئی ہوئی اے جیہدے اک ہتھ وچ ٹی وی دا ریموٹ اے تے دوجے چ سوٹے منہ والا شراب دا گلاس۔ جنا اپنی سنہری چین والی قیمتی گھڑی توں ٹائم ویکھدا ہویا اٹھیا تے وڈی میز تے پئی اوہدی شلوار قمیض تھلے آئی کالی چادر دا لمکیا ہویا حصا میز تے رکھدا ہویا اوہدے صوفے تے بہہ گیا۔

نظراں ٹکرائیں تے اوہنے ٹی وی بند کرکے ریموٹ نالدے صوفے تے سٹ دتا اتے شراب دا آخری گھٹ بھر کے گلاس کول پئے اسٹول تے رکھدی ہوئی سدھی ہو کے بہہ گئی۔ ٹی وی بند ہون نال کمرے نوں سپ سنگھ گیا۔۔۔ آواز آ رہی سی تے بس کندھ نال لگے وال کلاک دی، ٹک،، ٹک،، ٹک۔۔ ویلے دا احساس دواندی ہوئی گھڑی دی ٹک ٹک جنے توں برداشت نہ ہوئی تے اوہنے اٹھ کے چھت والے پکھے دا بٹن نپ دتا اتے اسپیڈ تقریباً آخری حد تک گھٹ کر دتی۔ پکھے دی بھاری تے رعب دار آواز گھڑی دی آواز تے غالب آ گئی جیویں کوئی وڈا وکیل کسے سچے بندے دی آواز نوں نپ لیندا اے۔

کڑی نے جنے دیاں اکھاں چ اکھاں پاندیاں ہویاں کول پئے ڈبے چوں جھٹکے نال دو کو ٹشو پیپر کھچے تے اپنے شرابی بلھاں توں گوڑھے رنگ دی سرخی دی پتلی جہی تہہ بڑی بے رحمی نال صاف کر دتی۔ دوہاں دی مسکراہٹ نے اک دوجے نوں اپنے ولھیٹے وچ لے لیا تے ہولی ہولی گلاں کرن دی آواز کمرے دی مشینی جہی فضا وچ گھل مل گئی۔ دساں کو منٹاں مگروں پونی بوتل ادھی ہو گئی تے جنے نے شراب والا اسٹول اک پاسے کرکے پکھے دی اسپیڈ ودھا دتی جیہدے نال وڈی میز تے پئے دوہاں دے کپڑے ہلن جلن لگ پئے۔

ہن کندھ نال لگی گھڑی دی آواز دا احساس تقریباً مک چکیا سی۔ کجھ چر مگروں جنے نے اپنا پنڈا صاف کرکے تولیہ اوہدے اگے سٹیا تے باتھ روم چ وڑن توں پہلاں پکھا بند کر دتا کیوں جے ایس دوران بجلی آون نال اے سی چل پیا سی۔ پکھا بند ہویا تے میز تے کھلے ہوئے انگریزی ناول دے ورقیاں نوں وی سکھ دا ساہ آ گیا۔ ہن جنا باتھ روم چ سی تے اوہ اکھاں بند کرکے صوفے تے پئی ٹھنڈکاں محسوس کر رہی سی۔

اچن چیتی لاگے ای مسیت دے اسپیکر دے مردانا جہے کھڑاک نال اوہ تھوڑا کو تربھکی، سدھی ہو کے بہن لگی تے صوفے دی ڈھو تے لمکے ہوے اوہدے آخری کپڑے وی کمرے دی سیلابی کندھ نال وتھ چ ڈگ پئے جیہناں نوں ویکھ کے اندروں لگی کنڈی دا لمکیا ہویا منہ ہور لمک گیا۔ اینے چ مسیت دے اسپیکر چوں اذان شروع ہو گئی،

اوہنے اپنے اگے پیا کنک رنگا تولیہ پھڑ کے سر تے رکھیا تے اکھاں بند کرکے فیر ٹھنڈکاں چ گواچ گئی

Facebook Comments Box

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Calendar

March 2024
M T W T F S S
 123
45678910
11121314151617
18192021222324
25262728293031