میرے بول اولے ۔۔۔ شریف کنجاہی

میرے بول اولے

شریف کنجاہی

اج میں بھیڑا، اج میں جھوٹھا، میرے بول اولے

چنگ تہاڈی ہٹی وِکدا، سچ تہاڈے پلے

اج وی جے میں اکھ مٹکے دے ای گیت سناواں

بال ناتھ دے چیلے والی تھاں تھاں ناد وجاواں

قصیاں دے وچ رانجھا بن بن جس گھر وقت گزاراں

اوسے گھر دیاں کڑیاں کڈھاں، اوتھے ای سنـھ ماراں

رناں دیاں اک اک کر کے سر توں پیراں تیئں

وارو واری چسکے لے لے کراں میں صفت ثنایئں

تاں تے مینوں چنگیاں جانو، میریاں واراں گاو

میرے اک اک مصرعے اتے رالاں پئے وگاو

جے میں آکھاں اسیں تسیں آں اک آدم دے جائے

کیوں مُڑ اک ونگاراں کٹے تے اک ویہلیاں کھائے

جے میں آکھاں دنیا اتے بے گھر نہ کوئی ہووے

جے میں آکھاں بڈھے ویلے ٹوکری کوئی نہ ڈھوئے

جے میں آکھاں مسا لونا رل کے سارے کھایئے

اک دوجے دیاں بانہوں بنیئے نالے بھار ونڈایئے

جے میں آکھاں جھغڑیاں والیاں ساریاں مسلاں ٹھپیئے

مار مکاو گلاں دے وچ نہ ہفیئے نہ کھپیئے

تاں میں بھیڑا تاں میں جھوٹھا، میرے بول اولے

چنگ تہاڈی ہٹی وکدا، سچ تہاڈے پلے

Facebook Comments Box

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Calendar

March 2024
M T W T F S S
 123
45678910
11121314151617
18192021222324
25262728293031