عورت تاریخ کیوں نہیں لکھتی ۔۔۔ صفیہ حیات

عورت تاریخ کیوں نہیں لکھتی

صفیہ حیات

جس زمانے میں

عورت کے حقوق کے لیے بنیادی نعرہ ایجاد ہوا تھا

اس سے اگلے دن

نفرت کے تھپڑ کی ابتدا ہوئی

کیلنڈر میں یہ بات درج نہیں

اس دن

تماشا گاہ میں مسخرے نے

تالیاں بجاتے اعلان کیا

عورت بدحواسی کے راستے پر چل پڑی ہے

ممکن ہے یہ باتیں

تاریخ کی کسی کتاب کا حصہ بنتیں

لیکن ۔۔۔۔۔

ہم عورتوں نے وقت گزاری کے لیے

رومانوی کتابیں

اور کھانا پکانے کے طریقوں والے رسالے پڑھے

سو تاریخ یک طرفہ رہی