اساں اپنی منگ نہیں چھڈنی ۔۔۔ افضل احسن رندھاوا

اساں اپنی منگ نئیں چھڈنی

افضل احسن رندھاوا

پاٹیاں چنیاں تے پگاں دیاں ساریاں لیراں جوڑ کے اساں سالو اک رنگاونا

بھجیاں ٹُٹیاں ساریاں بانہواں کٹھیاں کر کے اک پُل جیہا پُل اُٹھاونا

ہر اکھ تے ہر دیوے دی لو کٹھی کرکے، گو، گو کے، اک سورج ہیٹھ بناونا

کِھنڈیاں، وَنڈیاں، وچھڑیاں سب رُلدیاں واجاں کٹھیاں کر کے نعرہ اک جگاونا

جیہڑا مُل وی لاوو گے، اساں تار کے اپنا کیتا قول نبھاونا

اپنی رَت وچ اساں نہوا کے، آزادی دی اپنی منگ نوں، ویاہ لیاونا

پنج دریاواں دے سینے تے، پانی دی تھاں، جے کر پے گیا لہو دا ہڑھ چڑھاونا

سی نئیں کرنی

پر منگ نیئں چھڈنی

اساں اپنی منگ نئیں چھڈنی