میرے ویڑھے ۔۔۔ افضل راجپوت
میرے ویڑھے
افضل راجپوت
میرے ویڑھے، نم انار تے جامن اتے
چیتر دا رنگ ڈلھیا
یا ستلج وچ نہا کسے دا
عنبریں جوڑا کھلیا
میں تاں ہوشاں بھلیا
میرے ویڑھے، نم ، انار تے جامن اتے
بیٹھیاں گھگیاں بولن
سکھر دوپہرے گوڑھیاں چھانواں
والے گھونگھٹ کھولن
اگ سریر تے بکو بکی
لال شراباں ڈولھن
میرے ویڑھے، نم ، انار تے جامن اتے
نچ نچ بدل وسن
اجڑیاں دھرتیاں فیر وسن دیاں
مٹھیاں رمزاں دسن
میرے نین شدائی ہو ہو
روون نالے ہسن
Facebook Comments Box