دولے شاہ دے چوہے ۔۔۔ احمد نعیم ارشد
دولے شاہ دے چوہے
احمد نعیم ارشد
جَمدے سار ای ساڈے سِر تے
کڑا چڑھایا جاندا اے
سوچن سمجھن والی حِس نوں
مار مکایا جاندا اے
صدیاں تُوں اِک رٹیا رٹایا
سبق پڑھایا جاندا اے
سَجے کَھبے ہو نہیں سَکدے
اپنے آپ تے رو نہیں سَکدے
ایدھر اودھر ویکھ نہیں سَکدے
بدل کدی وی لیکھ نہیں سَکدے
اکو ای سبق غلامی والا
پڑھدے پڑھدے رَٹدے رَٹدے
دولے شاہ دے چوہیاں وانگر
نِکے نِکے سِراں دے اندر
نِکیاں نِکیاں سوچاں لے کے
نِکے نِکے سُفنے تک کے
ڈردے ڈردے، کَنمبدے کَنمبدے
ترس ترس کے مر جاندے ہاں
دولے شاہ دے چوہیاں وانگر
نویں سوچ توں ڈر جاندے ہاں
Facebook Comments Box