ونج کرن ونجارے ۔۔۔ احمد راہی

وَنج کرن ونجارے

احمد راہی

ونج کرن ونجارے

نی مُٹیارے

پہلاں ہس ہس لاندے

گُوہڑیاں پاندے

ہس دیاں وُس دیاں مٹیاراں نوں

ہنجوآں دے وس پاندے

مُڑ ٹُر جاندے

بدلاں دے پرچھانویں

نی ایہہ بجلی دے لشکارے

نی مٹیارے

ونج کرن ونجارے

لہندیوں سورج کدی نہ چڑھیا دنیا جانے

بناں ڈور نہ چڑھی کدی گُڈی اسمانے

ڈوہنگھے دریا، ویری چھلاں

سوچ سمجھ لے ساریاں گلاں

کچے گھڑے دغا دے جاندے

پہنچ کے ادھ وچکارے

نی مٹیارے

ونج کرن ونجارے

جے کر توں جگراتے کٹنے

جے کر توں ہیرے نے چٹنے

جے کر توں راتاں نوں سورج

دناں نوں لبھنے تارے

تاں تیری مرضی مٹیارے

نی مٹیارے

ونج کرن ونجارے۔