دو نظماں (رب دا جی)(رب نوں وی کھسرا آکھو)۔۔۔اقصیٰ گیلانی

رب دا جی

اقصیٰ گیلانی

عورت نوں کمزور آکھن توں پہلاں

پھانسی دی رسی تے لمک کے

 بچہ جمدی ماں دی پیڑ محسوس کرو

 دس کلو وزنی تکیہ اپنے پیٹ تے بَن کے

اک ہفتہ تے چلہا سانبھو

پکی کندھ وچ ٹکراں مار کے

ہر مہینے سر وی پاڑ کے

مرد کدی وی جان نئیں سکدے

عورت دی ماہواری کی اے

عورت نوں سکھ دینا سکھو

 عورت وی تے رب دا جی اے

رب نوں وی آکھو کھسرا

اقصٰی گیلانی

میرا ناں اے منو کھسرا

اج سنو ہاں میرا دکھڑا

ان ڈٹھی ماں دی میں دھی

خبر نہیں میری جنس وے کی

نہ میں منڈا نہ میں عورت

لیکھاں وچ عزت نہ شہرت

نہ میں لنگڑا نہ میں لولا

سوہنڑاں رنگ تے ماس وی کولا

میرے اتے ہسدے کیوں او

گندیاں نظراں رکھدے کیوں او

مینوں اج اک گل دسو گے؟

رب دی وی تے جنس نئیں نا؟

رب نوں ویکھ کے وی ہسو گے؟