ناں بھلن دی چس ۔۔۔ غلام حسین ساجد
ناں بھُلن دی چس
غلام حسین ساجد
کئی واری میں اپنا ناں بھل جانا واں
ناں بھلن دی اپنی چس اے
یاد پون دی اپنی
ناں بندے دے نال نہیں جمدا پر بندے دا ساتھی
جیہنوں اپنی وست سمجھ کے سارے سانبھ کے رکھدے
جیویں سوداگر صدری اندر سی کے ٹردے روکڑ
جیویں لکھاری اپنیاں لکھتاں دے پاہرو بن بہندے
جیویں ہوا خوشبو وچ بھِج کے ہور جیہی ہو جاندی
ناں تے بندہ ہک مک ہو کے وی نیں وکھرے وکھرے
کئی واری بندے نوں اپنے ناں دی سار نہیں ہوندی
کئی واری تاں بندے دے کرماں دے نال نہیں ٹھہندا
دونہاں دے رخ اک دوئے دے الٹے پاسے رہندے
ہک دوئے دے جانو بندے نہ منسُوہے تھیندے
میں نہیں ناں نوں وست بنایا
میں نہیں اوہنوں نال لے ٹردا، میں نہیں بوجھے پایا
جے ہووے تاں مان کے ویکھو ناں بھلن دی چس نوں
میں مانی اے !!
Facebook Comments Box