چل ٹر چل گھر میرے ۔۔۔ منو بھائی
نظم
( منو بھائی )
چل ٹر چل گھر میرے
اَج تک میرے گھر وِچ چانن
اِک وی جھات نہ ماری
آن رکی نئیں اِک پل اُوتھے
سورج دی اسواری
ڈوریاں کندھاں گونگے بوہے
چپ راہواں، بند باری
جوکاں بن کے خون نچوڑن
بےرونق دُکھ میرے
اِک میں سو انجانے دُکھ
اِک دیوا تیل نہ کھٹیا
اک میرا دل ریجھاں بھریا
بےقدری دا کھٹیا
اپنے گھر وِچ رونق بھر لاں
شوق دلیلوں اٹھیا
لاٹ حسن تیری دی پوجے
چانن چار چوفیرے
چل ٹُر چل گھر میرے
تیری صورت ایویں کر لگ دی
دل نوں ویکھی بھالی
اپنی کُنڈی آ کھڑکاوے
جیوں کر کوئی سوالی
خوشیاں بھرن بھڑولے
ہوون مٹ وختاں دے خالی
راتاں چانن بھریاں ہوون
خوشیاں بھرے سویرے
اَج تک انج نئی ہوئیا
بھاویں کیتے جتن بتھیرے
چل ٹر چل گھر میرے
Read more from Munnu Bhai
Read more Punjabi Poetry
Facebook Comments Box