جنہاں کھادی چوپڑی

( مشتاق صوفی )

رج بیٹھے او

مِٹھے رج نال

رج بیٹھے او

سُکھ دے چج نال

برکی برکی چڑھے اَپھار

پُھوک پھُلاوے اوجھر نوں

آندراں اپنی جا توں سرکن

ہڈاں دے ڈھنگراں تے ٹنگیاں بودیاں لیراں

گُھمن گھیر لہو دی بدرو ناڑاں سخت سُجاوے

مِسا ماس تڑکدا ونجیں بوٹی بوٹی

تھندے ساہ ہنگلاٹ ہلارے

جِبھ تالو تے لیوی

ہن تاں الٹی وی نہ آسی

جو اندر سو اندرے رہسی

بھانویں صدیاں دی بھکھ کٹو

رج دی موت نہ موڑیاں مڑسی