چیکاں دی کچہری ۔۔۔ صفیہ حیات

چیکاں دی کچہری

صفیہ حیات

دکھدیاں اکھاں

سڑدے پیراں نال مینوں جدوں ٹرنا پیا

دھپ نے میرے ہتھاں اتے چونڈیاں وڈھیاں

میں کہیا ماں ! جے مینوں گل نہیں کرن دینی

مینوں کوڑے وانگر بال چھڈ

میں ہاسے ونڈے

لوکی میرے ہاسیاں نوں چیکاں سمجھے

ویرے نے چیکاں دی کچہری لا لئی

میں اسماناں ول تکدیاں

ہر کندھ تے لکھیا

جے مینوں ساڑیا تہانوں وی سواہ کر چھڈاں گی

میں روندی

چپ دی بولی بولدی رہی

رب دا واسطہ وی دتا

پر اوہ کیہندا

چپ کر کلموہی ! تیرا میرا شجرہ نہ اک سی نہ ای ہونا

میں ہواواں ول دوڑی

ہوا نے اپنیاں باہواں نوں لپیٹ لیا

ناخناں نے جدوں ماس ادھیڑیا

لہو لہو کرلاندی

میں سولی نوں چادر بنا کے

نیندر دے گلے لگ کے

قبراں دی مٹی ہوگئی

۔