چنگڑ دا ڈھولا ۔۔۔ سلیم جہانگیر
چنگڑ دا ڈھولا
سلیم جہانگیر
ساڈا ہوکا ای ملکھا وسدیا، سنو خلقت ساری
چھڈ بوہکر، ڈانگاں، کنجیاں، تھی گئے انکاری
نہ کوئی اچکا چودھری، نہ کوئی پٹواری
اساں چنگڑاں آپے سانبھ لئی، اپنی سرداری
اساں کچ بچ جوڑ دوپہریاں سے لابھاں لائیاں
کنڈیاں نال پوٹے پُور لے تے لپٹاں آئیاں
پکیاں نوں ظالم پُچدے، اساں کدہے نہ چائیاں
پر ویلے اوڑک دتیاں، نویاں رشنائیاں
اساں ڈھیریاں چک لے جانیاں، اج ساڈی واری
اساں چنگڑاں سانبھ لئی، اپنی سرداری
اساں کَس ہناڑیاں ٹر پئے ، تاریاں دی لوئے
اساں پنڈ و پنڈ پھر نکلنا جیویں پھرن گنڈوئے
اساں کیڑیاں وانگر ملنے سبھ ٹبے ٹوئے
اساں ویہاں کن کن تاریئے، ساڈا اک وی موئے
اساں مرزیاں جُڑ کے بھننیاں جو گھر سرکاری
اساں چنگڑاں سانبھ لئی اپنی سرداری
نہیں من دے وچ وچولڑے، اسیں آپ سیانے
نہیں من دے کُوڑ کچہریاں، نہ چوکیاں ٹھانے
اساں چٹے ساوے لاہ کے پائے سُوہے بانے
رڑیاں تے اگاں بالدے ککھاں دے ڈھانے
نت راویوں اٹھدی کانگ تے ساڈی اسواری
اساں چنگڑاں آپے سانبھ لئی اپنی سرداری آپے