نظم ۔۔۔ صغرا صدف
نظم
صغرا صدف
آس دا دیوا بَال وے ماہی
ڈاھڈا مَندڑا حال وے ماہی
ہجر دے کھارے پانی میری
جِندڑی دِتٌی گال وے ماہی
جَد یاداں رَل دَھرنا دِتٌا
تُوں نہ بیٹھوں نال وے ماہی
تیرے باہجھوں لَنگھ اِی گئے نیں
صدیاں وَرگے سال وے ماہی
تُوں تے میں اَج وَکھ کھلوتے
ویلے چَلٌی چال وے ماہی
میرے جہیی وی کوئی نہیں ایتھے
تُوں وی بے مثال وے ماہی
باہجھ پَراں دے اُڈدی پئی آں
عِشق دا اُچ کمال وے ماہی
رات ہجر دی کَالم کالی
چَن جہیا مُکھ وَکھال وے ماہی
صغرا صدف فقیر نِمانی
لگیاں دی لَج پال وے ماہی
Facebook Comments Box