گواچیا تارا ۔۔۔ وقار احمد
گواچیا تارا
وقار احمد
بڑا اوکھا ہوندا اے
لبھنا
اوس تارے نوں
جہنوں تسیں ویکھدے اوہ
اوہ تہانوں ویکھدا اے
تسیں اوہنوں سوہنے لگدے اوہ
اوہ تہانوں سوہنا لگدا اے
تسیں اوس دے
دکھاں نوں سندے اوہ
پر اوہ تہاڈے دکھاں نوں سنن توں
پہلوں ہی
بدلاں وچ لک جاندا اے
تے بدل دے جاون مگروں
دِسدا ہی نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جتی
مائے نی !
اوہنے مینوں طلاق دے
چھڈی اے
میں تے بس
اینا آکھیا سی
کہ عورت دی ککھوں جم کے
اوس نوں پیر دی
جتی نہیں آکھی دا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
؟
پتا نہیں
کدوں آوے گا
اوہ ویلا
جدوں
زمین دی ہک نوں
لہو نال لال کرن
دی تھاں
ایس تے
لال گلاب اگائے
جاون گے۔
Facebook Comments Box