سوال ۔۔۔ عائشہ اسلم

سوال

 عائشہ اسلم))

روح دی ایس اگ نوں

ہڈاں دا بالن دیواں

تے چنگھیاڑ دا بالو بالاں

روح ہووے کہ جثہ

اکھیاں دے سفنیاں دی رڑکاں

دوہاں تے چھلکے پا دیندی ہے

ناں ہی پیڑ دا اُلاہمہ

تے ناں لنگھے ورھیاں دا کوئی حصہ

اج میری راہ نہ ڈکے

کل دی کوئی لیر

اج دی چنی دا مہنہ نہیں

فیر وی ورھدے مینہ دا اک اک گاون

تن تے من دا راگ ہے ہوندا

کون ہے جوگی جیہڑا بین بجاوندا ہے

تے کون ہے جس نوں سپ ڈنگدا ہے

کیہڑا زہر نوں امرت جان کے پی رہیا اے

کیہڑا اکھیاں دا سوال پڑھ رہیا اے

تے کدی خوشی جواب بن رہی ہے

ان کہے سوالاں تے باتاں نوں

کون اپنی لو دے رہیا ہے ؟