میں رُکھ تے نہیں ۔۔۔ اختر کاظمی
میں رُکھ تے نہیں
( اختر کاظمی )
اسیں صدیاں توں
دکھاں دیاں دھپاں دے وچ سڑ دے
نفرتاں دے پتھراں دے چوبھ نوں سہندے
صبر دے مٹھے پھلاں دی آس تے
اوھناں رکھاں وانگوں جی رہے آں
جیہڑے اپنے جثیاں دے اتے وجن والے
پتھراں دے بدلے
لوکاں نوں پھل دیندے نیں
اسیں کد تک انج ہی جیواں گے
اسیں سدھراں جذبیاں دے نال بھرے ہوئے دل
تے جیوندے جاگدے جثیاں دے مالک آں
اسیں کد تک دکھاں دیاں ایہہ دھپاں سہہ کے
سکھاں دے ٹھنڈے پرچھانویں ونڈدے رہیسوں
چنگیو لوکو ! سنو اسیں ہن
نفرتاں دے پتھراں دے بدلے
پیار دے مٹھے پھل ونڈنے چھڈ دیسوں
تے جو کجھ سانہوں ملسی
گن گن واپس کر سوں اج جوں
ایہہ صبر دا مٹھا پھل کد تایئں پھکدے رہیئے
اسیں بندے آن کوئی رُکھ نہیں
Facebook Comments Box