Akhter Kazmi is a famous Urdu poet. He is known for his poems which discuss the sociopolitical problems. Sometimes he is blunt in his verses leaving behind the poetic intricacies. He expresses himself in Punjabi as well with full command.

چنگے شہری

( اختر کاظمی )

اسیں چنگے شہریاں وانگر رہنا جان دے آں
اسیں مونہواں اتے 
دکھ لکاون والے
رنگلے ہاسے مڑھ کے
دھوڑ اڈاندیاں سڑکاں اتے آندے
سانہوں چار چوفیرے رتے رنگ دیاں بتیاں دسن
اسیں اپنیاں سدھراں دے ادھ موئے
جثے تک دے
تے اکھاں دے وچ نچدے اتھرو
ڈکن دے لئی
دھپ دے چشمے لاندے
اسیں ہسدے ہسدے سچ دے بھورے توں وی خالی
وعدیاں دے اکھر
ذہناں دے وچ بٹھاندے
اسیں ہر آندے دی چنگیائی دے نعرے لاندے
جاندے نوں بھل جاندے
اسیں آل دوالے وجدیاں چیکاں کولوں بچدے
ہتھ کناں تے رکھ کے ٹر دے
اسیں چنگے شہریاں وانگر رہنا سکھیا اے
اسیں سن دے نہیں
اسیں سن دے آں
پر تکدے نہیں 
اسیں تکدے آں
پر سوچدے نہیں
اسیں سوچدے آں
پر بولدے نہیں 
اسیں چنگے شہری