Dil Nawaz Dil is a senior poet from Pakistan Army. He writes poetry in English, Urdu and Punjabi.

کُھلا بُوہا

( دل نواز دل )

کندھاں چھتاں ڈگیاں سبھے

تُٹ گئے کُھر گئے نال بھڑولے

اک چوغاٹھ دے وچ کھلوتا

رہ گیا کلم کلا

کھلا بوہا

ایہدے چار چوفیرے

جتھوں توڑی نظراں جاون

اوتھوں توڑی

بلدے ویہڑے وچ کھلوتا

لک لک پانی

ایہنوں وی کوئی تارو آ کے

پُٹ لے جاوے

کُجھ نہیں ہور تے ایہدی لکڑی

بالن دے کم آ جاوے گی

ایہدے وچوں لنگھن والے

روڑھ کے اپنی بیڑی

ڈُب گئے پتناں اتے

ایہنوں ٹپ کے گھر دے اندر

ہن کسے نہیں آونا

جیہڑے گھر دا بوہا سی اے

اوھدے بُوہے وچ کھلوتا

بن کے اج پروہنا