ساڈا سماج تے عورت ۔۔۔ راشد جاوید احمد

ساڈا سماج تے عورت

راشد جاوید احمد

ورھے بیت گئے، پاکستانی عوام نے کجھ چنگا نہیں ویکھیا چنگا نہیں  سنیا۔ اکھاں ہر روز کسے نویں صدمے نال پھٹ پیندیاں نیں۔ حساں مردیاں جاندیاں نیں تے حق بولن والیاں دیاں زباناں ہر اون والی دیہاڑی بند کیتیاں جاندیاں نیں۔ میڈیا اچ، گولی، برود، موت، جرم، ریپ تے ٹارگٹ کلنگ جیہے اکھراں دا استعمال اینا کو چوکھا ہو گیا اے کہ اینکر کجھ وی کہنا چاہندا ہووے، ایہہ لفظ اوہدی زبان تو نکلدے ای رہندے نیں۔ کنے ای گھبرو نیں جنہاں اپنی جوانی کم دھندے دی تلاش ای گوا دتی اے۔ کنیاں ماواں دے پتر دہشت گردی دا شکار ہو گئے نیں۔ ایہہ او سماج بن چکیا اے جتھے انسان دی حیثیت پشوواں نالوں وی گھٹ گئی اے تے روز گھٹ دی جا رہی اے۔ پہلاں توں ای “جنس” تصور کیتی جان والی ” عورت” چوکھی تکلیف تے اذیت اچ اے۔

ماں، جیہڑی کدی خاندان نوں جوڑ کے رکھدی سی اج آپ کھلری پئی اے۔ حالت ایہہ وے کہ بر صغیر اچ وسن والیاں کروڑاں عورتاں ، غیر انسانی زندگی گزارن تے مجبور نیں تے ہر گزردے دن اوہناں دی ایس تکلیف اچ وادھا ای ہو ریا اے۔ سماجی پیداوار وچ اک وڈا حصہ پان والی عورت اج آپ اک جنس بنا دتی گئی اے، اک ایسی کٹھ پتلی جیہڑی ظلم وی سہے، کوٹھیاں تے نچے، مرد دی سیوا کرے پر اپنی سہولت واسطے کوئی انسانی حق نہ منگے۔ ایتھے جیہڑے لبرل مرد، عورتاں ، عورت دی آزادی دی گل کردے نیں اوہناں دی ” آزادی” صرف عورتاں لئی فیشن شوز تے سلیو لیس کپڑے پا کے گڈی چلان تک رہ گئی اے۔۔ خورے ایسے نوں عورت دا اعلی مقام متھیا جاندا اے۔

میری نظر اچ عورتاں دی آزادی صرف فیشنی آزادی نہیں بلکہ اپنی وسوں اچ عورتاں دے تواریخی مقام تے کردار نوں سمجھن لئی لازمی اے کہ اسیں تواریخ ول جھاتی پایئے جتھے عورت اج وانگ لاچار نہیں سی تے نہ ای فیشنی آزادی اوس دا مسئلہ سی۔ گزرے وقتاں اچ سانہوں عورت دا اک وکھرا اچا رتبہ نظر اوندا اے جدوں اوہدی اگوائی ہیٹھ نہ صرف گھر چلدا سی بلکہ پورا قبیلہ۔ مرداں سمیت کوئی کسے تے جبر نہیں سی کردا تے مل جل کے پر امن نظام چلدا سی جنہوں اسی سانجھی مالکی دا نظام کہہ سکنے آں۔ سدھے صاف لفظ ورتاں تے اوس زمانے اچ نجی مالکی دا کوئی وجود نہیں سی۔ تاریخ تے دس دی اے پئی عورت نے ہی سماج دیاں بنیادی جڑاں قائم کیتیاں سن تے شروع توں ہی حیاتی دیاں لوڑاں تے پیداواری کماں اچ پیش پیش سی۔ صرف ایہہ ای نہیں ، خاندان دے ہر بندے بشر نوں رزق تے خوراک برابری نال دینا وی اوسے دا ای کم سی۔ پرانے اشتراکی نظام اچ عورت سمجھ لو کہ ریڑھ دی ہڈی سی۔ ایہہ تے ہالی  شروع سی تے اگے چل کے  عورت نے ہور کئی کماں اچ اپنا حصہ پایا خاص طور تے جدوں مرد شکار لئی جاندا سی عورتاں چمڑے دیاں شیواں بنان اچ تے مٹی توں بھانڈے بنان اچ وقت گزاردیاں سن۔

عورت دے ایہہ کم ہی ایسے سن جیہڑے اوہنوں اوس ویلے قبیلے اچ اچی تھاں دیندے سن۔  انسانی تہذیب دی نیہہ اچ تے حیاتی دی موجودہ شکل اچ عورت دے ایس کردار دا بڑا حصہ اے۔ا یہہ عورت دی ہی قربانی تے محنت مشقت سی جو انسان اعلی قسم دے پیداواری عمل دے قابل ہویا اے۔ پر۔۔۔ایس پر بعد کوئی چنگا کم نہیں ہویا۔ وقت گزرن دے نال سماج اچ عورتاں دی حیثیت گھٹ دی گئی تے خاص طور تے نجی مالکی دے متے نال تے عورت دوجے پیداواری سومیاں تے اوزاراں ہار خاندان دی ملکیت بن دی گئی۔ اج دنیا تے نگاہ مارو تے عورت دی سماجی حالت صرف پچھڑے ہوئے ملکاں اچ ای نہیں اچے تے امیر ملکاں وچ وی ماڑی اے۔ نا برابری تے ظلم دا شکار اے۔ تیزاب چھڑکن ، جنسی حملیاں تے گھریلو زور زبردستی تے مار کٹ، ہن صرف تیسری دنیا دا مسئلہ ای نہیں۔ ” پڑھے لکھے ” ملک وی ایس علت دا شکار نیں۔ عالمی اداریاں دیاں رپوٹاں مطابق تیزاب گردی پشلے دس سالاں اچ دو گنی ہوگئی ہے تے ہر ہفتے دو توں زیادہ عورتاں قتل ہوندیاں نیں۔ نیویارک ٹائمز مطابق ہر سال فرانس اچ دو لکھ توں چوکھیاں بی بیاں اپنے خاونداں ہتھوں جنسی تشدد سہن کردیاں نیں۔ہندوستاں تے اوہدے آلے دوالے ملکاں وچ وی لگ بھگ انج دا ہی معاملہ اے۔ دہلی نوں تے پشلے دناں ” ریپ کیپیٹل ” آکھیا گیا۔ بنگلہ دیش اچ بچے بچیاں نہ صرف جنسی دھرو دا شکار ہوندے نیں بلکہ قتل وی کر دتے جاندے نیں۔

جے پاکستان دی گل کراں تے ایتھے جس طرحاں مہنگائی، بے روزگاری تے بھک اچی ٹیسی تے وے اوتھے ای بچیاں تےعورتاں دا استحصال وی بد ترین اے۔ عزت تے غیرت دے ناں تے عورتاں نوں جانوں مار دینا روز دا کارا بن چکیا اے۔ کدی گھر دیاں کندھاں اچ تے کدی اگ اچ ساڑ کے تے کدی جیوندی جاگدی نوں قبرے سٹ کے۔ غیرت نوں بنانہ بنا کے عورت نوں تعلیم توں وی دور رکھیا جاندا اے۔ عورت تعلیم نہیں حاصل کرے گی تے سماج اچچانن کیویں ہوئے گا۔ پاکستان اچ غیرت ہتھوں قتل ہون والیاں بی بیاں دی گنتی بڑی اوکھی اے۔ فیکٹریاں تے کارخانیاں اچ دیہاڑی دار عوتاں تے دفتراں اچ کم کرن والیاں سوانیاں  اندر استحصال پاروں ڈر، خوف تے وحشت اے۔عورتاں نوں مزدوری وی تھوڑی دتی جاندی اے تے بڑے بھیڑے طریقے ورتے جاندے نیں دھرو دے۔ ایہہ ساریاں گلاں نجی میڈیا تے سرکاری میڈیا اچ درست گنتی نال رپورٹ نہیں ہوندیاں ایس کر کے صحیح صورت سامنے نہیں اوندی۔

گل ایہہ وے کہ ایہہ سبھ کجھ کدوں تیک چلے گا، کدوں تیک دھرو جاری رہے گا تے کدوں تیک عورت نوں دبائی رکھو گے۔ تاریخ دس دی اے کہ جس شئے نوں جنا دبایا جائے اوناں ہی ابھر دی اے تے تیزی نال باہر اوندی اے، پھیلدی اے تے اپنی ہوند دا اعلان کردی اے۔ جے تاریخ ول دھیان کریے تے جتھے کدھرے بغاوت ہوئی ، عورت اگے ودھی تے مرد دے نال کھلو کے ظالماں نوں للکاردی رہی۔

اج دا مسئلہ جنس دا نہیں ، ونڈے ہوئے سماج تے نجی مالکی دا اے۔ ایہہ نظام انسانی سماج اچ گند پھیلا رھیا اے۔ ایس دا خاتمہ کیتیاں بغیر نابرابری تے نا انصافی دا خاتمہ نہیں ہو سکدا۔ پیداواری سومیاں دی نجی مالکی دا خاتمہ ہی سماج نوں مالکی تے دھرو توں بچا سکدا اے۔ عورت دی آزادی محنت کش طبقے دی آزادی توں وکھ کسے طرحاں نہیں۔ ایہہ لڑائی اک سانجھی طبقاتی جڑت تے جدوجہد نال ہی لڑی تے جتی جا سکدی اے۔

مُکدی گل ایہہ وے کہ جدوں تک کھیت مزدور، فیکٹری مزدور عورتاں نوں، عورتاں دی آزادی دی تحریک یا اکٹھ یا دھرنے اچ شامل نہیں کیتا جائے گا مقصد حاصل نہیں ہوئے گا۔