ساہواں دے بدل نیلے وے ۔۔۔ نسرین انجم بھٹی
ساہواں دے بدل نیلے وے
نسرین انجم بھٹی
ساہواں دے بدل نیلے وے، تے تلیاں دی کُکھ ہری
تریلیاں دا نگھا پانی۔ لہو دا تت وے ڈھولنو
تلیاں تے کیہہ جمسی ؟
سرہیوں ۔۔۔ سر ہیوں وے ماہیا
تلیاں تے سرہیوں جمسی
کدائیں جمسی
دل ہڑکدا نکے بال وانگن
کنوں پھڑ کے چاہواں۔۔ ایہندی ذات پچھاناں
ایہندا اصل کتھاں ہے ؟
ریتے اندر نگھی سِپی، اپنا من کدائیں کھولسی
کدائیں لشک مریسی
شیشہ بنسی تاں ٹُت ویسی، لُٹ ویسی، لُٹ ویسی وے سانولا
مینڈا دل مینڈا بالک دل
ماں مرن دے تراہوں کچرک بھجدا رہسی
ہرنی پھڑو کائی ہرنی دا بچہ
سفنے کد بھجسن وے سوہنیاں
پلکاں دی نیویں نیویں چھاں کد مکسی
دل کد تراہواں دا تھل لنسی
من کد میدانیں ونھیاں ویسی
میں صبراں پٹی، تلیاں کھول کھلی
Facebook Comments Box