غزل ۔۔۔ علی زریون

غزل

علی زریون

میں عشق الست پرست ہوں، کھولوں روحوں کے بھید​

مرا نام سنہرا سانورا، اک سندرتا کا وید​

​

مری آنکھ قلندر قادری، مرا سینہ ہے بغداد​

مرا ماتھا دن اجمیر کا، دل پاک پٹن آباد​

​

میں کھرچوں ناخنِ شوق سے ،اک شبد بھری دیوار​

وہ شبد بھری دیوار ہے، یہ رنگ سجا سنسار​

​

میں خاص صحیفہ عشق کا، مرے پنے ہیں گلریز​

میں دیپک گر استھان کا، مری لو میٹھی اور تیز​

​

میں پریم بھری اک آتما، جو خود میں دھیان کرے​

میں جیوتی جیون روپ کی، جو ہر سے گیان کرے​

​

یہ پیڑ پرندے تتلیاں، مری روح کے سائے ہیں​

یہ جتنے گھایل لوگ ہیں، میرے ماں جائے ہیں​

​

میں دور حسد کی آگ سے، میں صرف بھلے کا روپ​

مرا ظاہر باطن خیر ہے، میں گیان کی اجلی دھوپ​

​

من مکت ہوا ہر لوبھ سے، اب کیا چنتا؟ کیا دُکھ؟​

رہے ہر دم یار نگاہ میں، مرے نینن سکھ ہی سکھ​

​

ہیں ایک سو چودہ سورتیں، بس اک صورت کا نور​

وہ صورت سوہنے یار کی، جو احسن اور بھرپور​

​

میں آپ اپنا اوتار ہوں، میں آپ اپنی پہچان​

میں دین دھرم سے ماورا، میں ہوں حضرت انسان​

​