ابنارمل ۔۔۔ راشد جاوید احمد
ABNORMAL
ابنارمل
راشد جاوید احمد
شہر دے اک گھٹ رونقی علاقے دے اک چاء خانے وچ بیٹھیاں اوہناں نوں دس کو منٹ تے ہو گئے سن جدوں ویٹر نے چا ء دی چینک تے دو پیالیاں اوہناں دے ساہمنے رکھیاں۔ نارمل خاں نے کیتلی وچوں چاء پیالیاں وچ پاندیاں پچھیا،
” دو سوا دو گھنتۓ دے بس سفر بعد پہنچی ایں، خورے ناشتہ وی کیتا ای کہ نہیں۔ کجھ منگواواں چاء دے نال ؟ “
” نہیں، اسیں سویرے چھیتی اٹھن والے لوک ہاں، میں روٹی پانی کر لیا سی ٹرن توں پہلاں۔ ” نارسہ خاتون نے آکھیا تے اک پیالی اپنے ول کھسکا کے چاء دا گھٹ بھریا۔
” اچھا، پر جدوں دی آئی ایں بس چپ وٹی بیٹھی ایں۔ اک تے زمینی فاصلہ ساڈے درمیان سانہوں زیادہ ملن نہیں دیندا، تن سالاں ای چار ملاقاتاں، اوہ وی ادھیاں ادھوریاں، دوجے شہر چوں اونا واقعی اوکھا کم اے پر ہن آئی ایں تے کجھ بول وی ناں۔ ” نارمل خان نے بڑے پیار نال آکھیا۔
نارسہ نے چاء دی اک چسکی لئی تے پیالی میز تے رکھدیاں بولی
” کیہ گل کراں تیرے نال۔ توں کوئی گل دسدا ای نہیں۔ تن سال ہو گئے نیں، تن چار واری مل وی لیا اے۔ ان گنت وٹس ایپ تے وائس کالز پر توں اج تیک اپنے بارے کھل کے کجھ وی نہیں دسیا۔ حد اے بھئی۔ “
” میں کیہہ دساں، جو دسناں تینوں اوہدا یقین ہی نہیں اوندا۔ ” نارمل خان نے چاء دی پیالی میز تے رکھدیاں آکھیا، ” دس ہاں، ہن سبھ کچھ فیر دہراواں۔ بچپن، لڑکپن ، جوانی تے ہن جاندی جوانی تک میرے کول کوئی ایسی گل نہیں جو دسن لائق ہووے۔ میری حیاتی وچ ایسی کوئی گل واپری ہی نہیں جو گوہ دے قابل ہووے یا ۔۔۔۔۔۔”
” یا، چھپائی جاوے۔” نارسہ نے گل کت کے آکھیا۔ ، ” بس ایتھے ای گڑ بڑ ای۔ ایہہ کنج ہو سکدا اے پئی ایسی کوئی گل واپری ہی نہ ہووے۔ بس توں مینوں دسناں نہیں۔ خورے کیہہ چھپاندا پھرداں ایں۔ “
” او نہیں یار، کجھ ہے ای نہیں چھپان نوں ۔ میں کنی واری دس چکیاں۔ ” نارمل خان نے چاء دا اک ہور گھٹ لے کے بڑے آرام نال گل کیتی۔
“ہمممم۔۔۔ مطلب اے توں دسنا ای نہیں چاہندا۔ ” نارسہ دے چہرے تے ہلکے جیہے غصے دی سرخی نظر آئی۔
” نارسہ جان۔۔جان من۔۔۔ کیہو جیہی گل کرنی ایں۔ پیار محبت ، تعلق دا دعوی وی کرنی ایں تے میرا اعتبار وی نہیں کردی۔ ایہو گل میرا دل خراب کردی اے۔ توں پتہ نہیں میری حیاتی وچوں کیہہ لبھنا چاہنی ایں۔ پہلاں وی دسیا سی، ساری زندگی محنت مشقت وچ گزری۔ زندگی نے مینوں، اوہ کیہہ آکھدے نیں، غیر نصابی سرگرمیاں، اوہناں دی ویہل ہی نہیں دتی۔ سمجھ لے ریل دی پٹری تے چلدی زندگی اچ کوئی وی کراس پین توں پہلاں تیرے نال ٹاکرا ہو گیا تے بس۔ “
” ایہو ای تے میں پچھ رہی ہاں ” نارسہ نے ذرا طنز نال آکھیا، ” کہ آخر میں کنج من لواں کہ میرے توں پہلاں تیری زندگی وچ کوئی آیا ای نہیں۔ تیری فیس بک، انسٹا گرام تے اک بھیر لگی ہندی اے پر توں پراں تے پانی ہی نہیں پین دیندا پیا۔ “
” یا ربا، اوہ میریا ڈاہڈیا ربا،” نارمل خاں نے متھے تے ہتھ ماردیاں آکھیا، ” میں تینوں کنج یقین دواواں۔ تیرے نال وی تے فیس بک تے ہی ملاقات ہوئی سی۔ تیرے بولن دا ڈھنگ، گل بات تے چیزاں نوں سمجھن دی جاچ مینوں تیرے نیڑے لے آندا تے فیر ہولی ہولی گہرا تعلق بن گیا۔ محبت دا بوٹا پنگر پیا۔بس اینی ساری گل اے پر توں پتہ نہیں کیہہ جاننا چاہنی ایں۔ کدی کوئی ہور گل وی کر لیا کر۔ “
” نہیں۔ ” نارسہ خاتون نے چا ء دی خالی پیالی زور نال میز تے رکھدیاں آکھیا، ” جیہڑیاں توں مینوں میسنجر وچ تے وٹس ایپ میسجنگ وچ زہریلیاں گلاں سٹ دا رہنا ایں ، طنزیہ فقرے، اوس نوں محبت آکھدے نیں ؟ ‘
” اوہ سبھ کجھ ری ایکشن وچ سی نارسہ جان۔ میں وی انسان ہاں، مینوں پیار اوندا اے تے غصہ وی آ سکدا اے۔ یار عام واقف کار، دوست، جانن والے سب میرے تے اعتبار کردے نیں تے میری محبت نوں ہی میرے تے اعتبار نہیں۔ فیر ویکھ ناں ایہو جیہی ہر لڑائی بعد اسیں اک دوجے کولؤں سخت سست گلاں دی مافی وی منگ لیندے رہے ہاں پر پتہ نہیں اک دم توں فیر ایسے لیہہ تے کیوں ٹر پینی ایں۔
” بس کر نارمل خاں، اوہ تے میں تینوں سپیس دیندی رہی ہاں۔ ” نارسہ نے بہت سخت لہجے وچ آکھیا۔ ،” توں ہن وی مینوں کجھ نہیں دس رہیا۔ آخر محبت دے کجھ اصول ہندے نیں، کوئی درجے ہندے نیں۔ توں ایہناں درجیاں وچ گر بڑ کر دینا ایں۔ “
” ٹھہر جا تھہر جا۔ ” نارمل خاں نے ہتھ دے اشارے نال نارسہ نوں چپ کراندیاں آکھیا، ” ساڈے کامن فرینڈز ہین ناں۔ توں اوہناں کولوں پچھ سکنی ایں میرے بارے۔ میں اک حساس دل رکھدا ہاں۔ دنیا بھر دے جانداراں نال محبت میرا پہلا سبق سی۔ ایہو ای میری زندگی دا چلن اے۔ میں اپنے یاراں دوستاں تے واقف کاراں دے کم اوناں ہاں، اپنا نقصان کیتے بغیراوہناں دی مدد وی کر دیندا ہاں شاید ایس کر کے اوہ میری چوکھی عزت کردے نیں۔ پر میرے دل دا جوڑ تے توں ایں۔ میرے دل وچ تیری تھاں سب توں اچی اے تے اوتھے کسے ہور دی جا نہیں۔ دس ہاں میں کدی تیرا بھروسا توڑیا ؟ میں بھروسے والا بندہ ہاں۔ اپنے ناں ہار اک نارمل انسان ہاں یار۔ یقین کر میرا۔ “
نارسہ خاتون نے سخت بھیڑا منہ بنایا۔ اوس دے چہرے دا رنگ ہور لال ہو گیا سی۔ اوہنے گلے وچ لٹکیا دوپٹہ سینے تے برابر کیتا، پرس بانہہ تے لٹکایا تے اٹھدے ہوئے بولی،
” اج مینوں پک ہو گیا اے۔ توں میںوں کجھ وی دسناں نہیں چاہندا۔ توں کجھ نہ کجھ چھپاناں اے میرے کولوں۔ توں نارمل ایں ؟ میرے نال تعلق توں پہلاں کوئی واقعہ، کوئی سکینڈل، کوئی دشمنی، کوئی دوستی، کجھ وی نہیں تیری زندگی وچ، توں ضرور کجھ چھپا رہیا ایں۔۔۔ توں نارمل نہیں “
” سن تے سہی۔ انج اچانک کیوں کھلو گئی ایں۔ آل دوالے دے لوک کیہہ سمجھن گے۔ “؟
” نہیں پرواہ مینوں کسے دی وی۔ جہنم وچ جان سارے۔” نارسہ دی آواز غصے وچ بہت اچی ہوگئی سی۔ وڈیاں وڈیاں لال اکھاں اوہدے چہرے تے گڈ کے بولی، ” توں اک ابنارمل بندہ ایں۔ کل نوں کجھ نکل آیا جو چھپا رہیا ایں تے فیر؟ انج ڈر ڈر کے تعلق نہیں رکھیا جا سکدا۔ میرا مینٹل لیول تے بڑا ودھ ہے پر پتہ نہیں میتھوں، تینوں سمجھن وچ غلطی کیویں ہو گئی۔ میں ایہہ ڈر والا تعلق نہیں رکھ سکدی۔ بائے بائے فار ایور۔ ” اچی اچی بولدی نارسہ خاتون کیفے وچوں باہر چلی گئی۔
نارمل خان نوں انج لگیا جیویں اوہ کئی کلو میٹر پیدل چل کے آیا اے تے تھکے ہوئے پیراں نال اوس کاونٹر تے جا کے بل تاریا ۔ کیفے چوں باہر نکل کے موٹر سایئکل سٹارٹ کیتی تے دفتر پہنچ کے اپنی کرسی وچ جا ڈگا۔ ایہہ تیسری ملاقات وی کل کل ای بنی رہی۔ اوہ سمجھ نہیں پا رہیا سی کہ اوہدی غلطی کتھے وے۔ اوہنے سیل فون جیب چوں کڈھ کے میز تے رکھیا تے میسج والی ٹون وجی۔ لکھیا سی
” آئی ایم سوری۔ مینوں پتہ نہیں کیہہ ہو جاندا اے۔ مینوں تیرے تے ماسہ وی بے اعتباری نہیں۔ مینوں ماف کردے۔ اگوں انج نہیں ہوئے گا۔ “