لیکاں دا پھیر

(سید آصف شاہکار)

آ وے ماہیا ۔۔۔۔

تینوں ہتھ دی لیک وکھاواں

ہتھ، متھے تے دل دیاں لیکاں

کرماں، لیکھاں دیاں گنجلاں

سن وے ماہیا 

ویکھ 

اوہ میری لیک اچ سڑیا لہو

ابلدے ہوکے، چیکاں

تے کدایئں کُوڑے ہاسے

ماہیئے ٹھنڈا ساہ بھریا

ہنجو تریاں

نالے دل دی دھخدی اگ دا بھانبڑ مچیا

میرے اگے آ کے نچیا

میرا پنڈا پتھر ہویا

سن وے اولیا بھولیا سجنا

اے لیکاں تے مینوں اپنیاں لیکاں دِسن

ماہیئے دسیا ۔۔۔

دس وے ماہیئا

ہنجو، ہوکیاں ہیٹھ کھلوتیا ماہیا

تیریاں میریاں لیکاں نیں کیوں اکو جیہاں

اس نگری دیاں بوہتیاں لیکاں انجے ہوون

ہاں وے بھولیا انجے ہوون

ساڈے پتھر پنڈے پگھرے