نظم ۔۔۔ اختر کاظمی

نظم

( اختر کاظمی )

اپنیاں وچ وی اپنا کوئی نئیں
ایہہ سچ اے پر من دا کوئی نئیں
رکئے تے مر جان دا ڈر اے
ٹرن لئی وی رستہ کوئی نئیں
بھیڑا ویلا گھیر لوے تے
ڈردا نیڑے لگدا کوئی نئیں
جہڑا خلق دے ہنجو پونجھے
تھک بیٹھے آں لبھدا کوئی نئیں
اسماناں تے وی ورہیاں توں
لگدا اے ہن رہندا کوئی نئیں
پتھراں بھریاں راہواں اتے
نال کدی وی ٹردا کوئی نئیں
اووی توں وی میں وی اختر
سب چوٹھے نیں سچا کوئی نئیں