ثناور چدھڑ

پنجابی زبان دے معروف افسانہ نگار تے محقق ثناور چدھڑ ہن ساڈے وچ نہیں رہے۔ ثناور نیشنل بنک آف پاکستان وچ آفیسر سن تے پنجابی دے منے پرمنے لکھاری۔ ۔

ثناور چدھڑ دے ہن تیک دو افسانوی مجموعے سامنے آئے

پپل پرانی بھویئں دا

جویں توں جویں میں

دوہاں کتاباں نوں مسعود کھدر پوش ایوارڈ دتا گیا

ایس توں اڈ ثناور ہوراں کھوج دا ڈھیر سارا کم وی کیتا۔ ” پنجاب وچ تصوف ” کتاب راہیں ثناور نے تصوف دے پنجابی روپ نوں ساڈے سامنے رکھیا۔

” لوک تواریخ ‘ ایس کتاب اچ ثناور نے تاریخ نوں نصابی تے سرکاری نظراں توں اڈ عوامی عینک نال ویکھن تے سمجھاون دی کامیاب کوشش کیتی اے

ان چھپیاں کتاباں اچ ” وگدی اے راوی ” تے ” رسیلے پنجابی ” شامل نیں۔

ثناور صرف پنجابی لکھاری ای نہیں بلکہ ایکٹوسٹ وی سن۔ پنجابی زبان لئی ہر ویلے کسے نہ کسے کار اچ رجھے رہندے سن۔ اوہ پنجابی ادبی سنگت دے جوائنٹ سیکریٹری تے فیر سیکریٹری وی رہے۔ سنگت واسطے اوہناں دا سب توں وڈا کارا سنگت دی ترجمان، کتاب لڑی ” سنیہا ” اے جیہڑا پشلے 5 ورھیاں تو چھپ رہیا اے۔ ساہنوں ایس محنتی تے مخلص پنجابی کامے دی جدائی دا بہت دکھ اے