Sarfraz Safi is a progressive Punjabi poet and has a lot of poetry to his credit. He is a column writer as well. He is also attached with FM 95.

اِک تارا جِہا

 
( سرفراز صفی)

میَں اِک تارا ۔۔۔

امبراں اُتوں تھّلے آیا ، دنیا آکھے دھرتی جایا

۔۔ نہ کوئی ڈھول ڈھمّکے وَجّے ۔۔ نہ کوئی نچیا کھبّے سجّے

۔۔ نہ کُڑیاں نے گِدھّہ پایا ۔۔ نہ ای جھانجھر سُر چھنکایا

میَں اِک تارا ۔۔ امبراں اُتوں تھّلے آیا ، دنیا آکھے دھرتی جایا

۔۔ نہ میَں دودھ چھِلے توں پیتا ۔۔ کیہ کیہ دسّاں ، تینوں میِتا

۔۔ نہ میَں کھیڈی لُکن میٹی ۔۔ یار نہ لبھّا ، ماری سیٹی

۔۔ بچپن وچ بڑھاپا چھایا ۔۔ پورا کِتھّے ٹُرنا آیا

میَں اِک تارا ۔۔امبراں اُتوں تھّلے آیا ، دنیا آکھے دھرتی جایا

۔۔ میَں دھرتی دا ، پُت جے ہوندا ، کھاندا پیندا 

۔۔ وانگ بُلبلاں ، باغاں اندر ، چہکدا رہندا

۔۔ دھرتی ماں دا سب کجھ میرا ،سی سرمایا 

۔۔ پر کیہ دسّاں ، کجھ وی میرے ہتھ نہ آیا

میَں اِک تارا ۔۔ امبراں اُتوں تھّلے آیا ، دنیا آکھے دھرتی جایا