لال ہنیری ۔۔۔ تنویر قاضی
لال ہنیری
تنویر قاضی
یاد ولیویں دیندی اُڈدی
قرمزی شال
زخمی ہو جاون منقاراں
ٹُکدیاں ٹُکدیاں
ہجر دا پنجرہ
لنگھ دیاں جاون صدیاں
وصل دا سُفنا وییندیاں
توں کِس نُکرے چُھپی ہوئی ایں
لال ہنیریئے
وَگ تَگ وَگ پَے
دل میرا ناراض کبوتر
محراباں دی انکھ بنائی پھردا
اُلٹے پیریں چلن لگ پین چانک
نُوری سال
تیری ھِک دا آلہنا لبھدا
سوہل پکھیرو
ٹُر پیا اے تیری چال
لال ہنیریئے
کاش اساڈے آدرشاں لئی
وگدی ساڈے نال
Facebook Comments Box