انجلا ہمیش کے لیے۔۔۔ مسعود قمر
برہنہ پن حبس کا لباس کب پہنتاہے
( اپنی دوست انجلا ہمیش کے نام)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جب کھلی کھڑکیاں
اور
کھلے دروازےبھی
حبس بڑھانے میں
معاون ثابت ہونے لگیں
توکھڑکیوں
اور دروازوں سے
عاری مکان کے اندر
رہنے میں کیا حرج ہے
اگر تمہیں
حبس کی وجہ سے
کپڑے تبدیل کرنے میں
دشواری پیش آ رہی ہے
تو تم میرے اندرسے جاسکتی ہو
جانے سے پہلے
رگوں میں بہنے والی
سرخ وائین کے
خون بننے کا انتظار کر لو
وگرنہ
کھلے میدان میں بھی
کپڑے تبدیل نہیں کر پاو گی
حسن ایک پریشانی ہے
جو بےرحم وقت میں ابھرتی ہے
جب گھر کا سودا سلف
بجلی کے بلوں
زرد روشنی دیتےبلب کو ٹھیک کرانے
غسل خانے کی مرمت کرانے کے علاوہ
کہنے کو کچھ نہ ہو
لحافوں کو دھوپ لگوانے کےعلاوہ
کوئی کام کرنے کو نہ ہو
تو یہ صورت حال
انتہائی واجب الاحترام ہوجاتی ہے
اوربرہنہ پن
حبس والا سترپوش بن جاتا ہے
بغیر پسینہ نکلے
گھنٹوں بغل گیر رہنا
مرد کی وسعت کو گھٹا دیتا ہے
مگر
عورت کو تو فنا ہی کر دیتا ہے
میں نے
تمہارا کافی کا مگ
دھو کر رکھ دیا ہے
تم اسے کافی سے
لبالب بھر کر جاتے ہوئے
اپنے ساتھ لے کر جا سکتی ہو
اب ہمیں اکیلے اکیلے
سرخ وائین اور آئیریش کافی
پینے کی عادت
ڈال لینی چاہیے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسعود قمر