مجبوری ۔۔۔ عائشہ اسلم ملک
مجبوری
عائشہ اسلم ملک
اوہ بہت پہلاں ٹیلیوژن دے ڈرامے چ اداکاری کردا سی۔میں اوہدی پرستار ساں، فیر پتا نہیں کیویں اک دوست دی معرفت اوہدے نال فون تے گل بات ہوئی۔
میں دوسرے شہر چ اک کانفرنس تے گئی ساں تے میرے دوست نے کہیا جس دن وی فرصت ملے فورا دسو۔ ظہور منا چاہندا اے تے اسیں آواں گے۔
میرا دوست نہیں جاندا سی کہ میں ظہور نوں بطور اداکار دے پسند کرنی آں۔ اوہدے توں پتا لگیا کہ ظہور میریاں کتاباں پڑھ کے مینوں ملنا چاہندا اے۔ چلو اک گل تے چنگی ہوئی کہ اوہ میری شخصیت نوں نہیں من رہیا۔ اوہ مینوں محض عورت نہیں سمجھ رہیا۔ اک ذہن جان دے ہوئے مل رہیا اے۔ دو دن بعد میں دسیا کہ اج میں فارغ آں تے تسیں لوکی سارے ہوٹل ای آجاو۔ خوب گلاں باتاں کراں گے تے آرام نال بیٹھاں گے۔
دس وجے میں اپنی اک ہور دوست نوں وی ملنا سی۔ اوہنوں ہوٹل دے بوہے چھڈ کے میں مڑی ساں کہ احساس ہویا کہ کسے دیاں نظراں میرے جثے نوں تک رہیاں سن۔ میں مڑ کے ویکھیا تے اک درمیانی عمر دا بندہ تکدا پیا سی۔ پر دوجے ای پل اوہ کانفرنس چ آئی اک ہور لکھاری نال گل بات کر رہیا سی۔ میں اوہنوں تکدیاں سوچیا اوہو میرا بندہ ہو سکدا اے۔ تے فیر میں اپنے خیال تے سوچ نوں پرانہہ ہٹاندی ہوئی ہوٹل دی دوجی منزل دے کمرہ نمبر 202 وچ آگئی۔ آ کے میں روم سروس نوں کافی دا آرڈر دتا تے اپنی نویں کتاب دا مسودہ لے کے بہہ گئی۔ اجے میں دو ای ورقے پڑھے ہون گے کہ ٹیلفون دی گھنٹی وجی
” ہیلو جی۔ “
” میں ظہور آں۔ تہانوں ملنا چاہنا واں۔ جے اجازت ہووے تے حاضر ہو جاواں یا تسیں لابی وچ اونا چاہو گے۔ “
” مینوں کسے گل نال کوئی فرق نہیں پیندا۔ تسیں آنا چاہو تے ضرور آو پر اوہ دونویں کتھے نیں َ”
” بس اوندے ای ہونے نیں۔۔فیر اجازت ؟”
” آہو ۔۔۔ ضرور آو۔ “
فیر میں دوبارہ روم سروس نوں فون کر کے اک دی تھاں تے کافی دے دو کپ دا آردر دتا۔ اجے میں فون تے گل کر ای رہی ساں کہ بوہا کھٹکیا۔
میں دروازہ کھولیا تے ظہور نوں ویکھ کے حیران رہ گئی۔ ایہہ تاں اوہ ہی بندہ سی جنہوں میں اپنا بندہ کہیا سی۔ پر میرے ذہن وچ دس سال پرانا ظہور سی تے اج اوہ اک پختہ عمر دا آدمی سی۔ پہلے ورگا منڈا نہیں سی۔ میری حیرانگی اینی سی کہ میں بوہا کھول کے آپ راہ وچ کھلو گئی ساں تے ظہور نوں کمرے دے اندر آون نوں وی نہیں کہیا۔” کیہہ ساڈی ملاقات ایسے طرحاں دروازے وچ کھلوتے ای ہووے گی؟” ظہور دے پچھن توں میں شرمندی جیہی ہو کے پاسے ہو گئی۔
عجیب جیہی کیفیت سی۔ پر اوہنوں مٹان لئی میں ایویں ای آکھیا، ” تسیں بڑے ویلے سر آئے او، میں ہنے کافی لئی آکھیا اے۔ “
” ایہہ تاں تساں بڑا چنگا کیتا اے۔ “
” کھانا اوہناں دونواں دے اون تے کھاواں گے۔ فی الحال کافی پینی پے گی۔ “
” ضرور پیاں گے، پہلاں اک گلاس پانی پیاو۔”
” حوصلے لئی۔”
” آہو حوصلے تے صبر لئی۔ کیہ میں واقعی اج تہانوں مل رہیاواں ؟ نالے ہور وی کئی گلاں نیں۔ جیہڑیاں بعد وچ دساں گا۔
میں پانی دا گلاس دتا تے اک پل نوں ظہور دے ہیتھ نے میرے ہتھ نوں چھوئیا تے فیر۔۔۔۔
اسیں بڑی دیر تک گلاں کردے رہے۔ ظہور وی لکھدا سی، پر اوہ سندھی وچ لکھدا سی جیہڑی میں پڑھ نہیں سکدی ساں۔ میں آپ ای پڑھن دی کوشش نہیں کیتی کیوں جے بوہتا پڑھن نال عذاب ودھدے نیں تے میں پہلاں ای عذاباں توں تھکی ہوئی ساں۔
ظہور نوں میرا پنجابی وچ لکھنا چنگا لگدا سی تے اوہنوں میریاں گلاں، میریاں نظماں، کہانیاں چ اپنی شکل دسدی سی۔ ایسے کر کے اوہ میرے کول آیا سی۔ اوہ دونویں تے آے ناں تے ساہنوں وقت دا احساس وی نہیں ہویا۔ اک واری ظہور نے آکھیا
” اک گل کہواں۔ منو گے ؟”
میں دل وچ گھابر گی۔ کیہہ پتا کیہہ منگے۔ پر جدوں اوہنیں چا ء دی منگ کیتی تے میں ہس پئی۔
” ایہہ خواہش پوری ہو سکدی اے۔ “
پنج وجے دے قریب اوہ دونویں آ گے تے اپنی کسے الجھن بارے دسن لگ پے پر اسیں کجھ وی سنن نوں تیار نہیں ساں۔ ساہنوں ڈایہڈی بھکھ لگی سی تے اسیں اوس ویلے ہوٹل توں کتھے باہر کھانا کھان لئی نکلن دا ارادہ کر رہے ساں تے میں ظہور نوں کہہ رہی ساں
“ایہہ کیہڑا وقت اے۔ نہ دوپہر دی روٹی تے نہ رات دے کھانے دا ویلا۔ کوی ویکھے گا تے کیہہ کہوے گا۔ “
” ویکھن والیاں نوں بھل جاو۔ایس ویلے تے بڑی بھکھ لگی اے۔ “
” پہلے روٹی کھاواں گے تے فیر کجھ سوچاں گے۔ “
اوہناں دے اون نال اسیں چار بندے ہو گے میں پہلاں چیزاں سانبھیاں کہ مینوں راتیں دس وجے دی لاٹ توں واپس وی جانا سی۔ سوچیا کہ بس سامان چکاں گی تے ایئر پورٹ ٹر جاواں گی۔
اسیں کھانا کھاہدا تے فیر سڑک تے اسیں کجھ دیر سیر کرن دا سوچیا۔ اسیں سیر کر رہے ساں تے راہ وچ نرگس دے پھل ویچن والا اک لنگھیا ۔ ظہور نے پھلاں دا گلدستہ لیا۔ مینوں دتا۔ فیر اک نکر توں 555 دے سگریٹ دا پیکٹ لیا۔ اک سگریٹ سلگا کے میرے ہتھ پھڑایا تے میں حیران ہو گی۔ ایہہ کیہہ ؟ میرے سگریٹ پیون دا اوہنوں کیویں پتا لگا تے اوہنے کسراں جانیا کہ میں ایس ویلے سگریٹ پینا چاہنی واں۔ خیر میں سگریٹ پیتا۔ اسیں گلاں کردے رہے۔ کتاباں والی دکان تکی۔ اوہدے وچ جا کے میں کتاباں ویکھن لگ پئی تے کجھ کتاباں لے کے اسیں پرت آئے۔
ہوٹل آئے۔۔۔ کجھ دیر بیٹھے ۔۔۔ کافی پیتی ۔۔۔ اینے وچ فون آ گیا کہ تہانوں ایئر پورٹ چھڈن لئی گڈی تیار اے تسیں آ جاو۔
میں چیزاں ویکھیاں، میری عادت اے کہ اکثر اپنیاں چیزاں میز تے یا تکیے ہیٹھ رکھ دینی آں۔ میں احتیاطا تکیا ویکھیا۔ تکیے ہیٹھ میرے کناں دے جھمکے پے سن تے میز تے اک کارڈ۔۔۔ میں سوچیا شاید کارڈ کسے دتا ہووے تے میں بھل گئی ہوواں۔ ویکھیا۔ لکھیا سی
She ! Tthis is or you
بوہت خوبصورت کارڈ جیہدے وچ اک چنگے دوست نوں ملن دی خوشی دا اظہار سی تے ایہہ کارڈ ظہور ولوں سی۔ پتا لگیا کہ جدوں میں کتاباں تک رہی ساں اوس ویلے ظہور نے ایہہ کارڈ خریدیا سی۔
اسیں ساریاں نے اک دوجے نوں الوداؑ کیتا تے دوبارہ ملن دا وعدہ کیتا۔ میں اپنے شہر واپس آ گئی۔
دوجے دن ظہور دا فون آیا کہ دوبارہ کدوں آو گے۔ زیادہ دناں لئی۔ میں کہیا ، ویکھو۔
جواب ملیا، چھیتی آو۔ تہانوں ویکھن نوں جی کردا اے۔ یر شاید ظہور دا جذبہ سچا سی کہ میں مہینے بعد یر کسے کم دے سلسلے وچ اوہدے شہر وچ ساں۔ اسیں ملے۔ احساس ہویا جیویں بوہت زیادہ چر وچھڑے رہے آں۔ یر اوہی واپسی۔ ظہور دے جذبیاں دا اظہار تحفیاں راہیں ہوندا رہیا تے میں سوچدی رہی ایہنوں میری پسند میری خواہش میری ضرورت دا کس طرحاں پتا لگدا اے۔
فیر اوہ 25 دسمبر دا دن سی ۔۔۔۔ میں بڑی بیمار ساں۔ 24 نوں فون آیا تے ظہور کہیا میں صرف تیرے لئی آ رہیاں۔ میں منع کیتا پر ۔۔۔ 25 دی سویر نوں فون آیا ۔ میں آ گیا واں۔ بس کجھ دیر چ تیرے کول آ رہیاں۔
ظہور آیا تے پتا نہیں کیویں میں منجی توں اٹھ بیٹھی۔ اوہ سارا دن رہیا تے رات نوں واپس مڑ گیا۔ جدوں اوہ آیا سی اودوں بڑی بارش سی تے جدوں گیا اودوں وی مینہ ورہدا پیا سی۔
اسیں ملدے رہے ۔۔۔ وچھڑدے رہے
میں دو واری اوہدے شہر جا کے وی اوہنوں نہ مل سکی۔ وجہ مصرویت سی۔ پر اوہنے بوہت برا منایا تے ناراضگی دسن لئی لاے وچ خالی کاغذ بھیج دتا۔
میں اوہدی سالگرہ دے دن اوسے شہر چ ہوندیاں وی اوہنوں نہیں مل سکی تے اوہنے مینوں ایس گل تے کدی معاف نہیں کیتا۔ میں بوہت چاہندی ساں کہ اوہنوں ملاں پر کجھ ایسا ہو جاندا سی میں نہ مل سکدی ساں۔ اسیں کجھ چر مل بیٹھ کے چاء دی پیالی وی نہ پی سکدے سی۔
اسیں اک دوجے نال کوئی وعدہ وی نہیں سی کیتا تے نہ ای جھوٹیاں قسماں کھاہدیاں سن۔ پر اسیں اک دوجے نوں جاندے ساں، سمجھدے ساں۔ اک دوجے دی ضرورت سمجھدے ساں۔ اک دوجے توں وکھ نہیں ہونا چاہندے ساں پر وقت دی مجبوری جاندے ہوئے بھجیاں اکھاں نال وکھ ہو جاندے ساں۔
ظہور نال میری پہلی ملاقات چ کای تے چاء دی پیالی بڑی اہم ہو گئی تے میں سوچیا اوہدے نال بہہ کے چا پیتی جا سکدی اے۔ گل کیتی جا سکدی اے۔
مینوں جیہڑا بندہ چنگا نہ لگے اوہدے نال میں اک پل وی نہیں لنگھا سکدی یر چاء کیویں پی سکنی آں۔