لیکھ ۔۔۔ عارفہ شہزاد
لیکھ
عارفہ شہزاد
تختی اُتے گاچی ملی
ہل ہل کے سکائی
ڈنگے چبے حرفاں اتے
ویٹی گئی سیاہی
ہتھ بھری گئے سارے میرے
مونہہ تک کالک آئی
لوکاں توں لُکائی
تُھکاں لا لا پوجھی تختی
کسے کم نہ آئی
ٹوٹی تھلے رکھ کے دھوتی
گاچی مل سکائی
گھت گلابی پڑی دواتیں
گھوٹی مُڑ سیاہی
قط میں لایا کانے نوں تے
ترچھی قلم بنائی
ٹیڈھے میڈھے حرف رہے تے
بھیڑی رہی لکھائی
کسے نہ مڑ سکھائی۔
Facebook Comments Box