میرے گھر نوں دیمک لگ گئی اے ۔۔ کوثر جمال
میرے گھر نوں دیمک لگ گئی اے
ڈاکٹرکوثر جمال
میرے گھر نوں دیمک لگ گئی اے
ایہہ نکی جیہی اک سُنڈی اے
پر کٹھ ہے لکھ کڑوڑاں دا
ایہہ تیرے میرے گھر وچ گھس کے
اپنے گھر بناندی اے
مٹی رنگ دے خیمے لا کے
وانگ فوج دے رہندی اے
ایہہ حکم وڈی سرکار دا من دی
سجن تیری اے ی نہ میری اے
میرے گھر نوں دیمک لگ گئی اے
ایہہ لکڑی کاغذ کھاندی اے
حرفاں دے دیوے بجھاندی اے
ایہہ ہنیرا کردی جاندی اے
کندھاں بوہے ڈھاندی اے
چھت سراں توں لاہندی اے
ایہہ گجھیاں ماراں دیندی اے
ایہہ دشمن بڑی کمینی اے
میرے گھر نوں دیمک لگ گئی اے
میں کیویں ایس توں جان چھڈاواں
کیویں اپنا گھر بچاواں
نہ مردی اے نہ جاندی اے
نہ کھیڑا میرا چھڈ دی اے
ایہہ کِنی ڈاہڈی، پیڈی اے
ایہہ دشمن بڑی کمینی اے
میرے گھر نوں دیمک لگ گئی اے
سیانے مینوں دین صلاحواں
جس گھر نوں دیمک لگ جاوے
اوس گھر توں کدے نہ جاوے
اس گھر دیاں کندھاں ڈھا دے
نیہاں نوں زہر پلا دے
توں پہلا ایہدی پٹ بنا
فیر گھر اک نواں بنا
ایس کم وچ دیر نہ لا
جس گھر نوں دیمک لگ جاوے
اوس گھر توں کدے نہ جاوے
سیانے مینوں دین صلاحواں
توں اک گھر نواں بنا
میرے گھر نوں دیمک لگ گئی اے۔