میں جانتی ہوں ۔۔۔ عائشہ اسلم

میں جانتی ہوں

( عائشہ اسلم )

میں جانتی ہوں

اس عمر میں جھولا جھولنے کا انجام کیا ہوتا ہے

مجھے سر کے بل

یا اوندھے منہ گرنا ہوگا

میں پرندوں کا سفر دیکھنا چاہتی ہوں

مگر وہ کسی بات پر آمادہ نہیں ہوتے

میں خواہشوں کو جلاوطنی کی دھوپ سے بچا بھی لوں

تو جانتی ہوں

کبھی کبھی بارشوں کی صورت

زمین پہ طوفان آ جاتا ہے

کبھی مٹی سازش میں شریک ہو جاتی ہے

کبھی اچانک آگ بھڑک اٹھتی ہے

زمین کے عذاب

عمروں سے زیادہ طویل ہیں

اور اذیت فنا ہونے کے تجربے سے نہیں گزرتی

ہر گھڑی محشر کی گھڑی میں تبدیل ہو جاتی ہے

ٹک ۔ ٹک۔ٹک