آخری رسومات کے دوران ۔۔۔ عذرا عباس

آخری رسومات کے دوران

عذرا عباس

تمہیں یاد ہے

محبت کی آخری رسومات کے دوران

تنہائی کے ایک جنگل میں

میں نے تمہیں محبت کا ایک آخری تحفہ بھی دیا تھا

میرے کنوارے پن کی خوشبو

تمہارے پسینے میں گندھ گئی تھی

وہ شام

پہلے بوسے سے شروع ہوئی تھی

اور اندھیرے کی نذر ہو گئی تھی

لیکن محبت

بے سا ختگی کے اس وار پر

خوش تھی

محبت اپنی جیت کا جشن منا رہی تھی

کیا یہ یاد تمہارے لیے

ایک تحفہ نہیں ہے

جو اس دن تمہیں ملا تھا