چار جیبوں والی نظم ۔۔۔ غنی پہلوال
چار جیبوں والی نظم
غنی پہلوال
(سمیرا قریشی اور مرشد قمر مسعود کے نام)
مُجھے
ایک نظم بُننی ہے
کسی بچے کے سوئٹر کی طرح
جیسے سمیرا نے آپکی طرح
چار جیبوں والی قمیص شلوار سلوائی تھی)
—————————————-
چار جیبوں والی نظم
چار جیبیں ہونگی
مگر
وہ دیکھنے میں نظر نہیں آئیں گی
کیونکہ
وہ نظم کی داخلی پرتوں میں
ریشم کے غیر مرئی
دھاگوں سے بُنی جائیں گی
ایک
جیب میں آپکی والہانہ وارفتگی
دوسری
میں سمیرا کی خانہ بدوشانہ سرشاری
تیسری
میں میری کم مائیگی
اور
چوتھی میں ہم سب کا عشق پرویا جائے گا
پھر میں اپنی نظم کے
اس پہناوے کو
گیان کے ننگ دھڑنگ
اُس بابا کو پہناونگا
جو گرومندر کے چوک پر
فٹ پاتھ کی غلاظتوں میں لِتھڑا
,بے سُد پڑا رہتا ہے
۔۔۔۔۔۔۔۔۔۔۔۔۔۔
غنی پہلوال
Facebook Comments Box