آزاد شہری ۔۔۔ کمار پاشی

آزاد شہری

کمار پاشی

وہ مرنے پہ راضی نہیں تھا

بڑا ڈھیٹ تھا

شاہی فرمان پر

اس نے اپنی زبان کاٹ لی

وہ آنکھوں سے اندھا تھا

کانوں سے بہرا

اسے اپنے چاروں طرف

دیکھنے کی اجازت نہیں تھی

سماعت پہ پابندیاں تھیں

مگر شاہی دستور میں

ذکر ایسی کسی بات کا نہیں تھا

وہ آزاد تھا

اپنے گھر کی حدوں تک

بدن کی تہوں تک

وہ آدھا ادھورا تھا

دل اس کا

گہرے جذبوں سے خالی نہیں تھا

سنا ہے وہ اس پر بھی

مرنے پہ راضی نہیں تھا

وہ خوش تھا کہ اس ملک کے

شاہی دستور میں

اسے آزاد لکھا گیا تھا۔