کافی میں تیرتا سوال ۔۔۔ مسعود قمر
کافی میں تیرتا سوال
( اپنی محترمہ اشرف مسعود کے نام)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں
کئی دنوں سے
کافی کا پورا کپ
پی نہیں پا رہا
لگتا ہے
کافی کے کپ کا
اور
میرا ذائقہ تقسیم ہو چکا ہے
جیسے
میرا وجود ہونے اور نہ ہونے میں تقسیم ہوچکا ہے
میرے اندر کا وجود
اپنے تئیں مکمل ہے
مگر شعور سے خالی ہے
بظاہر
میرا اندر ہر شام اُس کےساتھ
تیس سال پرانی
سپینش وائین پیتے ہوئے
ڈانس کرتا ہے
مگر
خصوصی بچوں کی پیدائش سے ڈرتا
اُس کے ساتھ
لاتعلقی کی بجتی دھن پہ ڈانس کرنے لگ جاتا ہے
مجھے کافی کے کپ کو
ایک طرف رکھ کر
کافی کے سیاہ پن پہ تیرتے
سوال کو پڑھنا پڑتا ہے
شعور کیا ہے؟
شعور وہ ہے
جو وہ ہے؟
یا
شعور وہ ہے
جو وہ نہیں ہے؟
کیا بیل سے جنگ کرتے کرتے
مرجانا ہی
بُل فائٹرکی اصلی زندگی نہیں؟
شعور سے خالی وجود لیے پھرنا
اور
قبر سے باہر اعضا لیے پھرنا
تدفین اور وجود
دونوں کی توہین ہے
میں
کب کافی کا
پورا کپ پی پاوں گا
۔۔۔۔۔۔۔۔۔۔۔۔۔۔۔۔۔۔
مسعود قمر