ہوا ساکت رہی ۔۔۔ سبین علی

نظم

( سبین علی )

ہوا ساکت رہی 
دیا رات بھر جلتا رہا
حلق میں کوئی گولا سا پھنسا
جیسے آسمان کے کنارے پر شہابیہ 
فلک کی پور کو جلاتا ہوا گزر جائے
مگر دل اتنا پرسکون 
“محیط الھادئ” جیسے
جو چاہتا ہے
سارے پردے گرا دوں
نیم تاریک کمروں میں
رات سی ہو جائے
کاغذ کی ناؤ میں بیٹھ کر
کسی اجنبی جزیرے کی سیر کو نکلوں
یا تاروں بھرے فلک کو بلاؤں
رات کے دستر خوان پر 
ادھ لکھی نظمیں مکمل کرلوں
یا پرانے پیڑ کے نیچے 
چند گھڑیاں سستا لوں
مٹھی میں بھر کر 
سوندھی مٹی سونگھوں
یا پھر
ہوا کو سندیسہ بھیجوں
آؤ ری سکھی 
اُن راہوں سے کانٹے چن لیں
جو دل کی جانب آتے ہیں