• آنچل میں سمندر

• (سبین علی)

سوکھے پیلے پتوں کو

ہوا کی آغوش میں دیا تھا

جو راکھ بچی تھی

بادل کے سپرد کی

مہکتے سفید پھول

سورج کی روپہلی کرنوں کی نظر کیے تھے

یخ بستہ ہواؤں کا

مہمانوں کی طرح خیر مقدم کیا تھا

صحرا کی ریت پر چمکتے چھلاووں کو

سرابوں میں دھکیل دیا تھا

پھر

انہی روپہلی کرنوں نے

اک دن دھند کا رستہ

روک دیا تھا

بادل گھن گھن گرجے تھے

چنبیلی کو مہکا دیا تھا

پھر

میں نے اپنے آنچل میں

سمندر کو سمیٹ لیا تھا