Sheen Zad is a brilliant short story writer from Pakistan. His short stories portray life and problems of common man. He is a good poet as well.

غزل

( ش۔ زاد )

کچھ ایسی بات چرخ نیلگوں میں پائی جاتی ہے
خِرد بھی جس کے چکر میں خوشی سے آئی جاتی ہے

ہٹا لوں آنکھ تو حیرت میری باقی نہیں رہتی

جو رہنے دوں گھڑی بھر اور تو بینائی جاتی ہے

نظر کی ڈور ہو یا زندگی کی یا محبت کی

اُلجھ جائے تو پھر کمبخت کب سلجھائی جاتی ہے

نہ جانے کیا فسوں سازی ہے اس منظر کی ، پل بھر میں

نظر پتھرائی ہے اب آنکھ بھی پتھرائی جاتی ہے

مجھے تو یاد بھی کچھ کم نہیں ہے وصل سے ان کے

“جب ان کی یاد آتی ہے میری تنہائی جاتی ہے”

میں اس ہی کشمکش میں مبتلا ہوں ایک مدت سے

اگر پاتا ہوں لیلا کو تو پھر صحرائی جاتی ہے

جنوں ہے جو ہمیشہ ہوش میں رکھتا ہے انساں کو

خرد تو حیرتوں کے جام سے بہکائی جاتی ہے

چٹختا ہی چلا جاتا ہے گِرد و پیش کا منظر
سبھی کچھ ساتھ لے کر اک تری انگڑائی جاتی ہے