White background. Abstract simple shapes. Neutral business background. Elegant poster template. Light minimal brochure backdrop. Subtle white shapes. Vector illustration.
مہر زیدی کے لیے ۔۔۔ مسعود قمر
دودھ پیتا کاٹھ کا گڈا
(اپنی دوست مہر زیدی کے لیے)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رات گہری ہوتی جا رہی ہے
اور
اس کے ہونٹوں پہ
لگی لپ اسٹک بھی!
گہرا سرخ رنگ
دو انتہاوں کی طرف جاتا ہے
وہ حسن کی دیوی
کبھی کبھی مجھے
خون آشام لگنے لگتی ہے
اس کی پنڈلیوں پہ
دانتوں کے نشان ہیں
کمرے میں بچھے بستر پہ
سال ہا سال سے ایک بھی
شکن نہیں پڑی
مگر
دہلیز کے باہر پڑے
مختلف سائز کے جوتے
ایک دوسرے کے اوپر
اوندھے منہ پڑے ہیں
سرہانے پڑے جھولے میں
کاٹھ کا گڈا
گوشت کے لوتھڑے کا
روپ دھار چکا ہے
پستانوں کے دودھ کا ذائقہ
ان مردوں کے منہ میں ہے
جن کی جیبوں میں
ہر وقت
کنڈوم کی ڈیبیاں پڑی رہتی ہیں
کمرے کی دیواریں
جھوٹی سسکاریوں
اور
سچے آنسووں کی عادی
ہوچکی ہیں
مگر آنسو اور سسکاری
کسی عورت کو
کبھی حاملہ نہیں کرتے
جس دن کسی مرد کی
کنڈوم والی جیب
کسی جیب کترے کے
ہاتھوں کٹی
کاٹھ کا گڈا
پستانوں سے دودھ پینا
شروع ہو جائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔
مسعود قمر