پرکھ۔۔مالتوج سٹین/عذرا اصغر
پرکھ
مالتوج سٹین (ہنگری)
پنجابی التھا:: عذرا اصغر
” ماسی ! چھیتی چھیتی دس کیہہ کہنا اے۔ میرے کول اینا ٹیم نہیں جے۔ “
رچڑد سن نے گٹ بنی گھڑی ول تک کے بہت رکھے لہجے وچ آکھیا۔ غریب ماسی دیاں اکھاں چ اتھرو آ گئے۔ اوہنوں کیہہ پتہ سی پئی اوہدا لکھ پتی بھنیوا اوہدے نال ایڈی رکھیائی تے اوکھیائی نال پیش آوے گا جیہدے نال ملن لئی اوہاک گھنٹہ باہر اڈیکدی رہی تے باہر چپڑاسی دیاں جھڑکاں وی کھادیاں۔ اوہ کجھ کہن لگی سی تے رچڑڈسن فیر سختی نال آکھیا
” ویکھ ماسی۔ جے توں میرے کول پیسے منگن آئی ایں تے گل نہ کریں تے جے کوئی ہور کم اے تے فٹا فٹ دس۔”
ماسی نے کھنگن دی کوشش کردیاں آکھیا، ” میں پیسے منگن لئی نہیں آئی پر اک عرض لے کے ضرور آئی آں۔ “
” چنگا ۔۔۔ فیر چھیتی نال دسو۔ میں بہت کاہلی وچ ہاں۔ اک وڈے تاجر نوں ملن جانا اے۔ “
” اینی مہربانی کرو جے میرے پتر سیموئل نوں اپنے بنک چ نوکر رکھ لوو۔ اوہ ایس سال بی کام تے بی ایل چ فسٹ آیا اے۔ نالے میرا منڈا بہت ایماندار محنتی تے ذہین اے۔ نہ شراب پیندا اے نہ جوئے دی لت اے نہ کسے کلب وچ جاندا اے تے نہ کڑیاں نال پھردا اے۔ ۔ اوہ تہاڈے بنک واسظے بہت چنگا رہوے گا۔ ” مائی نے بہت دھیمے آکھیا۔
” پر میرے بنک چ تاں کوئی تھاں نہیں۔ ” رچڑڈسن نے بہت رکھائی نال آکھیا۔
” اک تھاں ہیگی اے۔ اخبار چ نوکری واسطے اشتہار چھپیا سی ۔ نالے میں پتہ وی کر لیا اے۔ “
” آہو۔ اوس تھاں بندہ میں آپی رکھنا اے۔ “
” جے ۔۔۔ ہے۔۔۔ تے اوس ۔۔۔ اتے سیموئل نوں رکھ لوو” مائی نے منت کردیاں آکھیا۔
” چنگا ۔۔۔۔۔ میرے کول ہن ٹیم نہیں جے۔ کسے ویلے عرضی بھجوا دینا” لکھ پتی رچڑڈسن نے ماسی نوں ٹالن لئی آکھیا۔
” عرضی میں لکھوا لیائی آں جی۔ ” مائی نے بہت ادب نال اک کاغذ کھیسے چوں کڈھیا تے میز تے رکھ کے معافی منگدیاں باہر نکل گئی۔ جیویں اوہنے اوہدا بہت ٹیم ضائع کیتا تے تکلیف دتی ہووے۔
مائی دے جاندیاں ای رچڑڈسن نے عرضی بغیر پڑھیاں پھاڑ کے سٹ دتی تے ٹہلن لگ پیا۔
” ایہناں رشتے داراں مذاق ہی بنا لیا اے۔ نک وچ دم کر دتا اے۔ روز منہ چک کے کوئی نہ کوئی آ جاندا اے۔ جیویں میں ایہناں لئی خیراتی ادارہ کھولیا اے۔ ” ایس دے نال ہی اوہنوں رشتے داراں دے ذکر توں اپنا بچپن یاد آ گیا۔
اوہ جدوں چھوٹا جیہا سی تے ماسی اوہنوں کنا پیار کردی سی۔ کچھڑ چک کے اوہنوں لئی پھردی سی تے چیزاں کھواندی سی۔ گرم گرم ٹافیاں تے بسکٹ دیندی سی۔ کنے محبت تے پیار نال اوہنوں لئی پھردی سی۔ میں اوہدے نال چنگا سلوک نہیں کیتا۔ نالے عرضی پھاڑنا تے سراسر نا انصافی والی گل اے۔ خبرے جے اوہ منڈا لائق ہووے تے اپنی لیاقت اتے امتحان وچ پاس ہو جاوے تے ایہدے وچ میرا کیہہ جاندا اے۔ ایس سوچ اوہنوں پریشان کر دتا۔ ایس پریشانی وچ اوس اپنے سیکٹری نوں بلایا تے اوہنوں آکھیا پئی گھٹو گھٹ دو گھنٹیاں تیکر اندر میرے کول کوئی نہ آوے۔ سختی نال ہدایت اے۔ فیر بوہا ڈھو کے اوہنے پاٹی عرضی دے سارے ٹوتے چک کے کٹھے کیتے تے اوہناں نوں جوڑ جوڑ کے گوند نال پکیاں کیتا تے فیر اپنے ہتھ نال اوس عرضی نوں نویں کاغذ اتے نقل کیتا تے سکتر نوں بلا کے عرضی دتی تے ہدایت وی۔
” ویکھو ! بنک وچ خالی اسامی لئی جیہڑیاں عرضیان آیئاں نے ، ایہہ عرضی وی اوہناں وچ رکھ لوو۔ میرا عزیز اے۔ سفارش والی گل نہین پر جے ٹسٹ انٹرویو وچ پاس ہو جاوے تاں ایہنوں رکھ لینا۔
کجھ دیہاڑے پچھوں ماسی فیر آئی تے اوہنے بڑے دکھ نال دسیا کہ اوہدے منڈے نوں نوکر نہیں رکھیا گیا حالانکہ اوس امتحان اول نمبر چ پاس کیتا سی۔ اوہدی تھاں شہر دے اک ریئس دے پتر نوں رکھ لیا گیا جیہڑا شہر وچ اپنیاں عیاشیاں تے بد معاشیاں توں مشہور اے۔
” میں ایس گل دی چنگی طرحاں پڑتال کراواں گا۔ ہن تے میں گورنر نوں ملن چلیاں تاں ہن میرے کول ٹیم نہیں۔ تے فیر ویکھاں گا۔ “
ماسی دے جان توں بعد اوہنے سیکٹری نوں بلایا تے پچھیا، ” کیوں بھئی اوہ منڈا بنک دی نوکری لئی ٹھیک نہیں سی ؟ “
” نہیں جناب ۔۔۔ امتحان وچ تے فسٹ آیا سی پر “
” پر ۔۔۔ کیہہ۔۔” بہت اوکھیائی نال رچڑڈسن پچھیا
” بنک دے قانون تے تہاڈے حکم مطابق اساں اوہدی عرضی تحریر تے نفسیات دے ماہر کول پرکھن لئی بھیج دتی سی۔ اوہنے اپنی پرکھ رپورٹ وچ دسیا جے بھئی اے تحریر لکھن والا بندہ جواری۔ شرابی۔ مکار بے ایمان تے لفنگا اے۔ ایس لئی اوس منڈے نوں نوکری تے نہیں رکھیا گیا۔ “
ایہہ گل سن دیاں ہی رچڑڈسن دے ہتھوں پائپ ڈگ پیا۔ ۔۔۔۔۔”