گلے سڑے پُھلاں دے ناں ۔۔۔ پاش
گلے سڑے پُھلاں دے ناں
پاش
اسیں تاں پنڈاں دے واسی ہاں
تسی شہر دے واسی تاں سڑکاں والے ہو
تسیں کاس نوں رینگ رینگ کے چلدے ہو ؟
ساڈا من پرچاواں تے ہٹی بھٹھی اے
تسیں کلباں، سنمے والے
ساتھوں پہلاں بڈھے کیکن ہو جاندے ہو ؟
ساڈی دوڑ تاں کالے مہر دی مٹی تیک
جاں تُلسی سُود دے ٹُونے تک ہے
تسیں تاں چن دیاں گلاں کردے ہو
تسیں اساتھوں پہلاں کیوں مر جاندے ہو ؟
اسیں کالجے کُٹ کُٹ کے وی سی نہیں کیتی
تسیں جو رنگ برنگے جھنڈے چکی پھر دے ہو
کھاندے پیندے موت تے چھڑاں چلاندے ہو
ایہہ بوہڑی دھاریا کیہڑی گل دی کردے ہو
ویکھیو ہن
ایہہ سُکی روٹی گنڈھے نال چباون والے
تہاڈے شہر دیاں سڑکاں، کمرے نگل جان لئی
آ پہنچے نیں
ایہہ تہاڈی ڈائننگ ٹیبل
تے ٹرے آں تک نگل جان گے
جد ساڈی روٹی تے ڈاکے پیندے سن
جد ساڈی عزت نوں سنہاں لگدیاں سن
تاں اسیں ان پڑھ پینڈو، مونہہ دے گُنگے ساں
تہاڈی لکچو کافی ہاوس چ کیہ کردی سی
تہانوں پڑھیاں لکھیاں نوں کیہ ہویا سی
اسیں تہاڈی خواہش دا اپمان نہیں کردے
اسیں تہانوں آدر سہت
سنے تہاڈے ہوند واد دے
برچھے دی نوک تے ٹنگ کے
چن اتے اپڑا دیواں گے
اسیں تاں ساد مرادے پینڈو بندے ہاں
ساڈے کول ‘اپالو’ ہے نہ ‘لُونا’ ہے