ناجیہ احمد کے لیے ۔۔۔ مسعود قمر

سارا مسئلہ دستک کا ہے

( ناجیہ احمد کے نام )

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔……………..

میں نے

آج ایوا سےسیب لیے بغیر

گزرنا چاہا

مگرایوا کے ہاتھوں کی مہک نے

مجھے گزرنے نہ دیا

اور

میں نے ایوا کے ہاتھوں کا لمس

چرانے کے لیے

دھوپ میں چمکتے

دوسیب

کھسکا لیے

کبھی بہار میں

آپ کی کھڑ کی پہ

خزاں نے دستک دی ہے

میری کھڑکی پہ

بھری بہار میں

خزاں کی دستک بجتی رہتی ہے

کیا کھڑکی میں رکھے سیب

اپنی چمک

اور

ایوا کے ہاتھوں کی مہک کھو دیں گے

خزاں کے گزرنے کے باوجود

میری کھڑکی پہ جب

مسلسل خزاں کی دستک بجتی رہی

تو

کھڑکی نے مجھے کہا

سارا مسئلہ دستک کا ہے

جو بہار

خزاں کے بُنے دستانوں سے

دیتی رہتی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مسعود قمر