رسیدی ٹکٹ ۔۔۔ امرتا پریتم/ثمین بلوچ
رسیدی ٹکٹ(چوتھی لڑی)
امرتا پریتم/ثمین بلوچ
اک سایہ
اک سرمئی جیہا سایہ سی جیہڑا ٹرنا سکھیا تے نال ای ٹر پیا سی۔ پر ہولی ہولی پتہ لگیا کہ ایس وچ بہت کجھ رلدا جا رہا اے۔۔۔۔ اپنے پیارے دا مونہہ وی تے اپنا وی جیہڑا حالے صرف میری ریجھ سی۔۔۔۔ میرے توں کتے ودھ سیانا، گمبھیر تے تگڑا۔ تے ایس توں علاوہ اپنے دیس تے ہر دیس دے بندے دا آزاد مونہہ وی۔ جیہڑا کجھ لکھدی رہی۔۔۔۔ ایسی ہڈیاں دے ڈھانچے نوں لہو تے گوشت دین دی چاہ وچ لکھدی رہی، اوہدے سرمئی رنگ وچ نورانی چمک بھرن دی سدھر وچ لکھدی رہی۔ اے اک طرح نال رب نوں زمین تے اتار لین دی خواہش سی۔ شاید ایسے لئی اے اک مونہہ تیکر محدود نہ ریہا۔ جتھے وی سوہنپ دا ذرہ سی، اوتھے تیکر کھلار اختیار کر گیا۔
اے اوہی “میں” اے، جس لئی لکھیا سی کہ بہت ہم عصر نیں، صرف اک میں میرا ہم عصر نہیں۔۔۔۔ اے اک ساڑ (سوز) سی، پنچھی دے گیت وانگوں۔ اک پل ہوا وچ، اگلے پل کتھے وی نہیں۔ جس کن نے سن لیا، ٹھیک اے، نہیں سنیا، تاں وی ٹھیک اے۔ کسی دے کن اتے نہ کوئی حق سی نہ دعویٰ!
بہت نکی سی، جدوں حیران ہوئی کہ میرے آلے دوالے کنیاں ای آوازاں سن جیہڑیاں گالاں بن گئیاں سن۔ کنے ای ناواں دے جھنڈے سن، تے تھڑے، جنہاں وچ اوہ جھنڈے گڈے ہوئے سن، اوہناں سمجھیا کہ میں وی اوتھے اپنے ناں دا کوئی جھنڈا گڈنا اے۔ آکھناچاہیا۔۔۔۔ دوستو! تہاڈے تھڑے تے تہاڈا علم تہانوں مبارک، مینوں کجھ نہیں چاہیدا۔ دھوکھا نہ کھاؤ۔ پر ویکھیا۔۔۔۔ کجھ کہنا سننا ممکن نہیں۔ سمجھیا کہ وقتی گل اے، کدی تاں ممکن ہوئے گی۔ پر اپنی زبان دے لکھاریاں دے ہتھوں اے کدی ممکن نہ ہوئی۔ نہ اج توں ویہہ ورھے پہلاں، نہ اج۔
اے میرا پہلا المیہ سی، پر علم نہیں سی کہ عمر جنا لما ہوئے گا۔ کجھ وڈیرے چہرے۔۔۔ سن— گوربخش سنگھ جی، دھنی رام چاترک، پرنسپل تیجا سنگھ جیہڑے پیار نال، شاید ترس نال، مسکرائے سن، پر اوہناں وچوں دو چہرے بہت چھیتی وچھڑ گئے تے گوربخش سنگھ جی، جیہڑا کجھ ادب وچ بیتیا سی، اوہدے توں بہت چھیتی لاتعلق ہو گئے۔ شاید بے لاگ۔
دل دیاں ڈونگھیایاں وچ سب توں پہلا درد جس دے چہرے دی لشک وچ ویکھیا، اوہ اس مذہب دا سی جس مذہب دے لوکاں لئی گھر دے بھانڈے وی اچھوت منے جاندے سن۔ ایہو چہرہ سی جیہڑا میرے اندر دے انسان نوں اینا کھلا کر گیا کہ ہندوستان دی ونڈ ویلے، ونڈ دے ہتھوں تباہ ہو کے وی، دونہاں مذہباں دے ظلم، بنا کسی رعایت یا پکھ پات دے لکھ سکی۔ اے چہرہ نہ ویکھیا ہندا تاں “پنجر” ناول دی تقدیر جانے کیہہ ہندی۔
میں اکوی ورھیاں دی سی، جدوں قیاسی چہرہ ایس زمین تے ویکھیا سی (ایس میل نوں بہت سالاں بعد میں بڑی تفصیل نال “آخری خط” وچ لکھیا سی) اے “شقی” وانگوں روز اگ وچ نہاؤن والی حالت سی۔۔۔۔ ایتھوں تیکر کہ 1957ء وچ جدوں اکادمی دا ایوارڈ ملیا، فون تے خبر سندے ای سر توں پیراں تیکر میں بھج گئی (جھلس گئی)۔ خدایا! اے سنیہڑے میں کسی انعام لئی تے نہیں سن لکھے جس لئی لکھے سن، اوہدے توں نہ پڑھے گئے۔ ہن ساری دنیا وی پڑھ لوے تاں مینوں کیہ۔۔۔۔ اوس دن شام دے ویلے اک پریس نے رپورٹر گھلیا، فوٹو گرافر وی، اوہ جدوں فوٹو لین لگا، اوہنے کاغذ تے قلم دے راہیں اوہ پل قابو کرنا چاہیا جیہڑا کسی نظم دے لکھن دا ویلا ہندا اے۔ میں سامنے میز تے کاغذ رکھیا تے ہتھ وچ قلم پھڑ کے کاغذ تے نظم لکھن دی بجائے۔۔۔۔ اک بے خودی جیہے عالم وچ اوہدا ناں لکھن لگ پئی، جس لئی اوہ سنیہڑے لکھے سن۔ ساحر، ساحر۔۔۔۔ سارا کاغذ بھر گیا۔ پریس دے لوک چلے گئے تاں کلے بیٹھی نوں ہوش جئی آئی۔۔۔۔ سویرے اخبار وچ فوٹو نکلے گی تاں میز دے کاغذ تے اے ساحر، ساحر دی رٹ۔۔۔۔ تے خدایا! مجنوں دے لیلیٰ لیلیٰ پکارن والی حالت میں اوس دن اپنے پنڈے وچ ہنڈائی۔ اے وکھری گل اے کہ کیمرے دا فوکس میرے ہتھ دے اتے سی کاغذ تے نہیں ایس لئی دوجے دن دے اخبار وچ کاغذ توں کجھ نہیں سی پڑھیا جا سکدا (کجھ نہیں سی پڑھیا جا سکدا، ایس گل دی تسلی توں بعد اک درد وی ایس وچ شامل ہو گیا۔۔۔۔ کاغذ خالی وکھالی دیندا اے۔۔۔۔ پر رب جاندا اے کہ اے خالی نہیں۔۔۔۔)
ساحر نوں میں تھوڑا جیہا “اشو” ناول وچ لکھیا، فیر ‘اک سی اینتا’ وچ تے فیر “دلی دیاں گلیاں” وچ، ساگر دے روپ وچ نظماں کئی لکھیاں سن، ‘سنیہڑے’ سب توں لمی نظم ‘چیتر’ ناں دی ساریاں نظماں، تے اک آخری نظم “آگ دی ایہہ بات ہے، تو ہے ایہہ بات پائی سی”۔۔۔۔ لکھ کے لگیا کہ ہن چودہ ورھیاں دا بن باس کٹ کے آزاد ہو گئی سی۔ پر لنگھے ہوئے سال۔۔۔۔ پنڈے تے پائے کپڑیاں وانگ نہیں ہندے، اے جسم دے تل بن جاندے نیں۔ بھاویں زبان توں کجھ نہیں کہندے، جسم تے چپ چاپ پئے رہندے نیں۔ بڑے سالاں بعد۔۔۔۔ بلغاریہ دے دکھن ول “وارنا” دے تھاں تے ٹھہری ہوئی سی جس دے اک پاسے سمندر سی، اک پاسے جنگل، اک پاسے پہاڑ، اوتھے اک رات ایوں لگیا۔۔۔۔ جیویں سمندر ولوں اک بیڑی آئی ہووے، تے بیڑی وچوں کوئی اتر کے، باری دے راہ توں۔۔۔۔ سالم دا سالم۔۔۔۔ میرے ہوٹل دے کمرے وچ آ گیا ہووے، ہوش تے بے خودی مل جئی گئیاں۔ اوس رات نظم لکھی سی “تیریاں یاداں بہت دیر ہوئی جلا وطن ہوئیاں۔۔۔۔”
خاموشی دا اک دائرہ
پچھانہہ مڑ کے کئی میل پچھے ول ویکھاں تاں ملک دی ونڈ توں پہلاں دے اوہ دن سامنے آؤندے نیں، جدوں اچانک لاہور دی فضا بھیانک افواہاں نال کوڑی ہو گئی سی۔ میرے نال، میرے ویاہ توں علاوہ کجھ نہیں سی بیتیا۔ چار دے سن وچ جیہڑی منگنی ہوئی سی، اوہ سولہ سال دی عمر وچ پروان چڑھی، بڑی پدھری جئی چلدی زندگی وانگوں۔ پر ادبی حلقیاں وچ بڑیاں رومانی کہانیاں پھیل گئیاں۔ پتہ لگیا، پنجابی شاعری وچ جس شاعر دا ناں سب توں آدر نال لیا جاندا اے، اوسے شاعر نے میرے تے کئی نظماں لکھیاں نیں۔ اے اوس زمانے دے مشہور شاعر موہن سنگھ دا ناں سی۔ پر جنہاں محفلاں وچ میں موہن سنگھ جی نوں ویکھیا، اوہناں نال معمولی جئی ملاقات ہوئی، ایس توں ودھ کجھ نہیں۔ شاید اوہناں دی فطرت ای گمبھیر تے مٹھڑی سی۔ ایس لئی مینوں اوہناں نال کوئی گلہ نہ سی۔ پر آلے دوالے اٹھدیاں کہانیاں توں میں خوش نہیں سی۔ میرے دل وچ اوہناں لئی اپنے مہان شاعر ہون دے ناتے، اک آدر سی، پر ایس توں ہٹ کے کجھ نہیں سی۔ میرا دل اپنی ای تہہ توں اٹھدے ہوئے سائے نال بھر رہا سی، ایس لئی آلے دوالے دے افسانے صرف ایہو ڈر جگاؤندے سن کہ میں اک غلط فہمی دا گڑھ بن رہی آں۔ فیر وی موہن سنگھ جی دا خلوص ایس طرح دا سی کہ اوہناں تے کوئی گلہ نہیں کر سکدی سی۔ فیر اک شام موہن سنگھ ملن آئے، اوہناں دے نال شاید ڈاکٹر دیوان سنگھ سن یا کوئی ہور، ہن مینوں یاد نہیں، تے پتہ لگا اگلے دن اوہناں نظم لکھی، “جائیداد” جس دے مطلب سن۔۔۔۔۔ اوہ بوہے وچ چپ چاپ کھڑی سی، اک جائیداد وانگوں، اک مالک دی ملکیت وانگوں۔۔۔۔۔
میرے لئی، اے میرے دل دے بڑے اوکھے دن سن۔ نظم دی صاف بیانی مینوں بے چین کر رہی سی۔۔۔۔ کہ اک چنگے بھلے بندے نوں میری خاموشی غلط فہمی وچ پا رہی اے۔ پر سمجھ وچ نہیں آ رہیا سی کہ خاموشی نوں میں کس طرح توڑدی؟۔۔۔۔ میرے سامنے موہن سنگھ جی نے اپنی خاموشی کدی نہیں سی توڑی۔ ایس خاموشی دی اک اپنی عزت سی، جیہڑی قائم سی۔ تے فیر اک دن موہن سنگھ آئے۔ اوہناں دے نال فارسی دے جانکار کپور سنگھ سن۔ میرا جھاکا ایسے طرح قائم سی جس وچ آدر وی شامل سی پر شاید کجھ رکھیائی وی کہ اچانک کپور سنگھ جی بول اٹھے۔۔۔۔ “موہن سنگھ!” ڈونٹ مس انڈر سٹینڈ ہر، شی ڈز ناٹ لو یو۔۔۔۔” تاں چر توں جمی خاموشی کجھ پگھل گئی۔ اوس دن میں حوصلہ کر کے کہہ سکی۔ “موہن سنگھ جی! میں تہاڈی دوست آں تہاڈا آدر کردی آں، تسیں ہور کیہ چاہندے او؟۔۔۔۔” میں بڑے جھکدے لفظاں وچ صرف اینا کہیا تے میری سمجھ وچ اے کافی سی۔ موہن سنگھ جی نے کجھ نہیں کہیا، صرف بعد وچ اک نکی جئی نظم لکھی جس وچ اوہی بول دوہرائے “میں تہاڈی دوست آں، میں تہاڈی دوست آں، تسیں ہور کیہ چاہندے او؟” تے اگلیاں سطراں اک اداسی نال لکھیاں “میں ہور کیہ چاہندا واں۔۔۔۔” پر کجھ کہانیاں جئیاں ادب وچ فیر وی چلدیاں رہیاں۔ کئی زبانی، کئی کجھ لوکاں دیاں لکھتاں وچ اشاریاں نال، پر موہن سنگھ جی ولوں کوئی ایسی تحریر نہیں آئی جیہڑی دکھ دین دا کارن بن دی (دل آزاری دا باعث ہندی)۔ ایس لئی میری ولوں وی اج تیکر اوہناں دے آدر وچ کدی کوئی فرق نہیں آیا۔
اک معمولی جیہا واقعہ ہور وی پیش آیا سی۔۔۔۔۔ لاہور ریڈیو دے اک افسر سن، جنہاں نوں شاید ادب نال کجھ پیار سی۔ اک دن میرے اک پروگرام (براڈ کاسٹ) توں بعد اچانک کہن لگے “جے میں اج توں کجھ سال پہلاں تہانو ویکھیا ہندا تاں میں مسلمان توں سکھ بن گیا ہندا یا تسیں سکھ توں مسلمان بن گئی ہوندیاں۔۔۔۔۔” اے بول اچانک ہوا وچ ابھرے تے اسے تیزی نال ہوا وچ گھل گئے۔ میرا خیال اے، اے اک کڑواہٹ دا ابال سی جس دا نہ کوئی پہلا پل اوہدے نال جڑیا سی، نہ کوئی اگلا۔ فیر اوس دن توں بعد اوہناں کدی کجھ نہیں کہیا پر میں اج تیکر نہیں جاندی کہ اسے ویلے دی فضا وچ اوہناں دے کسی وی احساس دی گل کیویں پھیلی۔ شاید کسی دے سامنے اوہناں دی زبان توں۔ تے پتہ نہیں، کہڑے لفظاں وچ، کہ بعد وچ اوہدا بڑا توڑ مروڑ کے ذکر وی پڑھیا۔ کئی وار لگدا اے کہ پنجابی لکھاریاں کول لکھن لئی کوئی گمبھیر موضوع نہیں اے۔ اوہ آپ ای افواہاں پھیلاندے نیں، آپ ای اوہناں نوں اپنی مرضی نال جتھے چاہن موڑ دیندے نیں تے فیر اوہناں نوں لکھ لکھ کے اوہناں توں سواد لیندے نیں۔۔۔۔۔ ہاں ورھیاں بعد جدوں میں دہلی ریڈیو وچ نوکری کیتی، تاں اک پنڈت سیتا دیو شرما ہندے سن جیہڑے لاہور ریڈیو وچ وی سٹاف آرٹسٹ ہندے سن تے ہن دہلی ریڈیو وچ وی سٹاف آرٹسٹ سن اوہناں ہندی وچ اک کہانی لکھی، ‘ٹوینٹی سکس مین اینڈ اے گرل’ کہانی دا سرناواں اوہناں گورکی دی کہانی توں ای لیا، پر لکھیا اوس پرانے واقعے نوں۔ تے کہانی لکھ کے مینوں سنائی۔ بڑے صاف دل بندے سن۔ اوہناں دسیا کہ لاہور ریڈیو وچ، تہانوں نہیں پتہ، کیہ کنے لوک تہاڈے وچ دلچسپی لیندے سن، خاص کر اوہ افسر وی۔ تے اسیں سارے سٹاف دے لوک مہینیاں تیکر اک فکر دے نال ویکھدے رہے کہ اگے کیہہ ہوئے گا؟ پر کجھ نہیں ہویا۔ شرما جی اے کہانی شاید کدی وی نہ لکھدے، پر مینوں ویکھ کے اوہناں نوں ورھیاں دا پرانا اوہ انتظار یاد آ گیا جس وچ اوہ کجھ ہون دے امکان بارے سوچدے سن۔۔۔۔۔ کہانی وچ سٹاف دے چھوٹے چھوٹے لوکاں دے کناں دا ذکر سی، جیہڑے کوئی افواہ سنن دی آس وچ کندھاں دے نال لگے رہندے سن۔ کجھ سنائی نہیں دیندا سی تاں حیران بیٹھ جاندے سن کہ شاید کجھ ہو ای چکیا اے پر کناں تیکر نہیں اپڑ رہا۔۔۔۔۔ شرما جی عام جیہے رائٹر سن، پر میرا خیال اے، اے کہانی اوہناں دی سب توں سوہنی کہانی سی۔ اوہناں نے اک کھچے ہوئے ماحول نوں پھڑن دی کوشش کیتی سی پر اپنی ولوں، پنجابی لکھاریاں وانگوں زبردستی کوئی نتیجہ نہیں سی کڈھیا۔ کہانی وچ اک ایماندار سادگی سی۔
نفرت دا اک دائرہ
گل اے وی نکی جئی اے پر اک بہت وڈے نفرت دے دائرے وچ گھری ہوئی اے۔ پنجابی دے اک شاعر سن جنہاں نال کدی نہیں سی ملی۔ اے وی میری ادبی زندگی دے وچکارلے دناں دی گل اے، لاہور دی۔ تے پتہ لگدا رہندا سی کہ اوہ میرے خلاف بہت بولدے نیں۔ میں کدی ویکھیا نہیں سی، ایس لئی حیران ہوندی سی کہ اوہناں نوں میری ذات نال کدوں دی تے کس گل دی ساڑ (پرخاش) اے؟ فیر ملک دی ونڈ توں تھوڑا چر پہلاں دی گل اے کہ اک وار مینوں کجھ بخار ہو گیا تے اک اخبار دے ایڈیٹر حال چال پچھن آئے۔ اوہناں دے نال اک ہور صاحب سن جنہاں نوں میں پہلاں کدی نہیں سی ویکھیا۔ اوہناں ناں دس کے ملایا تاں میں تراہ (چونک) پئی۔۔۔۔ اے اوہی سن جنہاں نوں میرے وجود نال وی نفرت لگدی سی۔ حیران سی کہ اے اج میرا حال پچھن لئی کیویں آ گئے؟
دو تن دناں بعد اک ہفتے وار اخبار وچ چھپی اوہناں دی نظم پڑھی جس دے تھلے اوہی تریخ لکھی سی جس دن اوہ ملن آئے سن۔ تے اے نظم عجیب و غریب محبت دی نظم سی۔۔۔۔ ایویں لگیا، جیویں نہ نفرت دی کوئی وجہ سی، اسے طرح نہ ایس ابال دی۔ فیر اوہ کجھ واری گھر آئے، حیرت نال پچھیا کہ اے اچانک مہربانی کیویں؟ پر کجھ وی سمجھ نہ آیا۔ اے مندی آں کہ اوہناں دے کسی بول وچ کوئی چلبلا پن (شوخی) نہیں سی، پر سختی ضرور سی کہ سب لوک گھٹیا نیں، میں کسی نوں نہ ملیا کراں۔ ایتھوں تیکر کہ لاہور ریڈیو لئی میں جدوں ادب تے تنقید لکھنی ہندی تاں اوہ ضد کردے کہ فلاں لکھاری دا ناں نہ لینا، فلاں دی تعریف نہ کرنی، فلاں دی کتاب دا ذکر نہ کرنا۔ ایس ادبی پابندی نال دم گھٹن لگا تاں میں پریشان ہو گئی۔
پر ایس تلخی نوں حالے زبان ملی ای سی کہ ملک دی ونڈ ہو گئی تے میں اوہناں دی سنگت توں آزاد ہو گئی۔ فیر کجھ سالاں بعد سنیا کہ اوہناں دے خیال وچ ہندوستان دی ونڈ اسے لئی ہوئی کہ میں اوہناں دی دوستی نہیں سی منی۔ اوہناں دی سمجھ وچ ہزاراں معصوم لوکاں دے قتل دا اے میرے اتے جیہڑا الزام سی، اوہنوں کوئی نفسیات دان ای سمجھ سکدا اے، میں نہیں سمجھ سکدی۔ تے ویکھن وچ آیا کہ ہن اوہ فیر میرے خلاف بولدے سن تے میرے خلاف نظماں لکھدے سن۔ اے نفرت جیویں اک گول دائرہ سی جس دا آخری سرا وی پہلے سرے نال جڑیا ہویا سی۔۔۔۔
1947ء
بھانویں پرانی تریخ دے ظلم و ستم نال بھرے ورقے اسیں پڑھے ہوئے سن، فیر وی ساڈے ملک دی ونڈ ویلے جو کجھ ہویا، کسی دے خیال وچ وی ایسا خون پین آلا باب نہیں آ سکدا سی۔ دکھ تے تکلیف دیاں کہانیاں سنا سنا کے لوک تھک گئے سن پر اے کہانیاں عمر توں پہلاں مکن والیاں نہیں سن۔ میں لاشاں ویکھیاں سن، لاشاں ورگے لوک ویکھدی سی، تے لاہور توں آ کے ڈیرہ دون پناہ لئی، فیر نوکری کیتی تے دہلی وچ رہن لئی تھاں لبھن دہلی آئی سی۔ جدوں واپسی دا سفر کر رہی سی تاں چلدی گڈی وچ نیند اکھاں دے نیڑے نہیں سی آ رہی۔۔۔۔ گڈی دے باہر دا گھٹا ٹوپ ہنیرا ویلے دی تریخ ورگا سی، ہواواں ایں سائیں سائیں کر رہیاں سن جیویں تریخ دی جھولی وچ بیٹھی کراہ رہی ہووے۔ باہر اچے اچے رکھ اگے ہوئے سن۔ کئی وار رکھ نہ ہندے، صرف ویرانی ہندی تے اوس ویرانی دے ٹیلے ایوں لگدے جیویں قبراں بنیاں ہوون۔ وارث شاہ دے بول میرے ذہن وچ گھم رہے سن ‘بھلا موئے تے بچھڑے کون میلے’۔۔۔۔ تے مینوں لگیا، وارث شاہ کنا مہان شاعر سی، اوہ ہیر دے دکھ نوں گا سکیا۔ اج پنجاب دی اک دھی نہیں، لکھاں دھیاں رو رہیاں نیں۔ اج اوہناں دے دکھ نوں کون گائے گا؟ تے مینوں وارث شاہ توں علاوہ ہور کوئی ایسا نہ لبھیا جس نوں مخاطب کر کے میں اے گل کہندی۔ اوس رات بھجدئی گڈی وچ ہلدی تے کنبدی قلم نال اک نظم لکھی۔۔۔۔
اج آکھاں وارث شاہ نوں، کتھوں قبراں وچوں بول
تے اج کتابِ عشق دا، کوئی اگلا ورقہ پھول!
اک روئی سی دھی پنجاب دی، تُو لکھ لکھ مارے وین
اج لکھاں دھیاں روندیاں، تینوں وارث شاہ نوں کہن
اٹھ درد منداں دیا دردیا! اٹھ تک اپنا پنجاب
اج بیلے لاشاں وچھیاں، تے لہو دی بھری چناب
پر ایہو نظم سی، جدوں لکھی سی تاں اپنے پنجاب وچ کئی اخبار میرے لئی الزاماں نال بھر گئے سن۔ سکھاں نوں اعتراض سی کہ میں اے نظم وارث شاہ نوں کیویں لکھی، گرو نانک نوں لکھنی چاہیدی سی۔ تے کمیونسٹ کہندے سن کہ میں لینن یا سٹالن نوں کیویں نہیں لکھی، ایتھوں تیکر کہ ایس نظم دے خلاف کئی نظماں لکھیاں گئیاں۔۔۔۔۔
خالص عورت
بچپن دے ودھدے پھلدے پنڈے (اعضاء) دے نال، پتہ نہیں کہڑی گھڑی، اک خیال وی جسم دا حصہ بن جاندا اے تے ودھن پھلن لگدا اے۔۔۔۔ تے اپنا دل آپے ای جادو (سحر) لگن لگ پیندا اے۔۔۔۔۔ دنیا نوں بنان والی، رب دی طاقت دا مٹھی بھر حصہ شاید ہر انسان دے حصے آؤندا اے، پتہ نہیں، پر میرے حصے ضرور آیا سی۔۔۔۔۔ تے اوہدے وچوں میں اک مرد دا سایہ گھڑیا سی۔۔۔۔۔ تے اوس سائے نوں اپنے جسم نال چموڑ کے۔۔۔۔۔ عمر دے سال لنگھان لگ پئی سی۔
ہو سکدا اے، اے جس نوں میں طاقت کہیا اے، اے اپنی قدرتی شکل وچ طاقت نہ ہووے، اے کجھ ایس طرح دی قوت اے جیہڑی بہت وڈے خطرے ویلے اک عام جیہے بندے دے اندر وی آ جاندی اے، جیہڑا ساریاں مٹان والیاں طاقتاں نوں ساہمنے ویکھ کے اپنا آخری حیلہ وی اپنے اندر جگا لیندا اے۔۔۔۔۔ عورت سی، بھانویں نکی جئی، تے اے ڈر ورثے وچ پایا سی۔۔۔۔۔ کہ دنیا دے بھیانک جنگل وچ کلے نہیں لنگھیا جا سکدا۔ تے شاید اسے ڈر وچوں اپنے ساتھ لئی اک مرد دے چہرے دا تصور کرنا، میرے خیال دا آخری حیلہ سی۔۔۔۔۔ پر ایس ‘مرد’ لفظ دے میرے مطلب کتھے وی پڑھے سنے یا پچھانے ہوئے مطلب نہیں سن۔ اندروں جانندی ضرور سی، پر اپنے آپ نوں وی دسن دی سکت نہیں رکھدی سی۔ صرف اک بھروسا (اعتماد) جیہا سی۔۔۔۔۔ کہ ویکھاں گی تاں پچھان لواں گی۔
پر دور دور تیکر کجھ نظر نہیں آؤندا سی۔ تے ایوں سالاں دے نیڑے اٹھائی میل نکل گئے۔۔۔۔۔ میں جدوں اوہنوں پہلی وار ویکھیا۔۔۔۔۔ تاں میرے توں وی پہلاں میرے دل نے اوہنوں پچھان لیا۔ اوس ویلے میری عمر اٹھائی ورھیاں دی سی۔۔۔۔۔ اے خیال اینے سال جیوندا رہا تے اوہدے مطلب وی جیوندے رہے، ایس تے حیران ہو سکدی آں، پر حیران نہیں۔ کیونکہ جان لیا اے کہ اے میری “میں” دی وضاحت سی۔ سی وی تے ہے وی!
میں انہاں سالاں وچ نہیں مٹی، ایس لئی اوہ وی نہیں مٹی۔ اے نہیں کہ خیال دے نال گلہ نہیں آیا، ایس عمر دی کئی نظمیں نرا گلہ ای نیں۔۔۔۔۔ جیویں، ”لکھ تیرے اخباراں وچوں، دس کی لبھا سانوں؟ اکو تند پیار دی لبھی، او وی تند اکہری۔۔۔۔۔“ پر اے اکہری تند سالاں نال ٹٹی نہیں، اسے طرح میری جان نوں اپنے اندر لپیٹ کے میری عمر دے نال چلدی رہی۔۔۔۔۔
انہاں سالاں دے راہ وچ دو وڈے حادثے ہوئے۔ اک جنہاں نوں میرے دکھ سکھ نال ہمیش دا واسطہ سی، میرے ماپیاں دے ہتھوں ہویا، تے دوجا اپنے ہتھوں۔ اے اک، میری چار سال دی عمر وچ منگنی دی شکل وچ، تے میری سولہ سترہ سال دی عمر وچ ویاہ دی شکل وچ سی۔ تے دوجا جیہڑا میرے اپنے ہتھوں، اے میری ویہہ اکیس سال دی عمر وچ اک محبت دی شکل وچ سی۔
پر خیال جیہڑا میرے پنڈے دے وانگوں میرے بدن دا حصہ سی۔۔۔۔۔ میرے بدن وچ بے پکھ (بے لاگ) ہو کے بیٹھا رہا۔۔۔۔۔ اوہنوں کئی سال سماج نے وی سمجھایا، تے کئی سال میں آپ وی، پر اوہنے پلکاں نہیں جھپکیاں۔ اوہ سالاں دے پار۔۔۔۔۔ اوس ویرانی ول ویکھدا ریہا، جتھے کجھ وی نظر نہیں آؤندا سی۔۔۔۔۔ تے اج اوہنے پلکاں جھپکیاں، اوس ویلے میری عمر نوں اٹھائیسواں سال لگا ہویا سی۔۔۔۔۔ تے اوس ویلے۔۔۔۔۔ میں جانیا۔۔۔۔۔ کہ کیوں اوہنوں، ایس توں کجھ وکھ یا ادھا یا تقریباً سارا وی، کجھ نہیں سی چاہیدا!
ایوں میرے وجود دے اندر دی عورت ہمیش میرے اندر دے لکھاری (ادیب) توں تھلے رہی اے، کئی وار ایتھوں تیکر کہ میں اپنے اندر دی عورت نوں اپنے آپ نوں یاد کراندی رہی آں۔ صرف لکھاری دا روپ ہمیش اینا لشکدا رہندا اے کہ میری اپنی اکھاں نوں وی اپنی پچھان اسے وچوں ملدی اے۔ فیر وی زندگی وچ تن موقعے ایسے آئے سن۔۔۔۔۔ میں اپنے اندر دی خالص عورت نوں جی بھر کے ویکھیا سی۔ اوہدا روپ اینا بھریا بھرایا سی کہ میرے اندر دے لکھاری دا وجود میری یاد توں مٹ گیا سی۔ اوتھے، اوس ویلے کوئی تھوڑی جئی وی خالی تھاں نہ سی جیہڑی اوہدی یاد دلاندی۔ اے یاد صرف ہن تازہ کر سکدی آں۔۔۔۔۔ سالاں دے فاصلے تے کھڑی ہو کے۔
پہلا ویلا۔۔۔۔۔ اوس گھڑی ویکھیا سی، جدوں میری عمر پچی سال دی سی۔ میرا کوئی بچہ نہیں سی تے مینوں اکثر رات نوں اک بچے دا خواب آؤندا سی۔ اک ننھا جیہا چہرہ، سوہنے تیکھے نقش، سدھا نک، ٹک (مسلسل) میری ول ویکھ رہا۔ تے کئی وار دے خواب توں مینوں اوہدے چہرے دی پکی پچھان ہو گئی سی۔ خواب وچ میں بوٹیاں نوں پانی دے رہی ہندی سی تے اچانک اک گملے وچوں پھول اگن دی بجائے اک بچے دا چہرہ اگ پیندا سی۔۔۔۔۔ میں حیران ہو کے پچھدی سی۔۔۔۔۔ ”توں کتھے سیں؟ میں تہانو لبھدی رہی۔۔۔۔۔“ تے اوہ چہرہ ہس پیندا سی۔۔۔۔۔ ”میں ایتھے سی، لکیا ہویا سی۔“ میں چھیتی نال گملے توں بچے نوں چک لیندی سی۔ جدوں جاگدی سی، میں اونی ای ویران ہندی سی، کلی۔ اک خالص عورت جیہڑی جے ماں نہیں سی بن سکدی تاں جیوندا رہنا نہیں سی چاہندی۔
دوجی وار۔۔۔۔۔ ایس طرح دا موقع اوس ویلے ویکھیا سی، جدوں اک دن ساحر آیا تاں اوہنوں تھوڑا جیہا بخار چڑھیا ہویا سی۔ اوہدے گلے وچ پیڑ (درد) سی۔۔۔۔۔ ساہ کھچواں جیہا سی۔ اوس دن اوہدے گلے تے چھاتی تے وکس ملی سی۔ کنی دیر ملدی رہی سی۔۔۔۔۔ تے لگیا سی۔۔۔۔۔ ایوں پیراں دے بھار کھڑی، میں پوریاں نال، انگلیاں نال، تے ہتھیلی نال اوہدی چھاتی نوں ہولی ہولی مل رہی آں، میرے اندر دی خالص عورت نوں اوس پل دنیا دے کسی کاغذ قلم دی لوڑ نہیں سی۔
تے تیجی وار۔۔۔۔۔ اے خالص عورت، میں اوس ویلے ویکھی سی۔۔۔۔۔ جدوں اپنے سٹوڈیو وچ بیٹھے ہوئے امروز نے۔۔۔۔۔ اپنا پتلا جیہا برش اپنے کاغذ توں چک کے، اک وار لال رنگ وچ ڈبویا سی، تے فیر اٹھ کے اوہنے اوس برش نال میری متھے (پیشانی) تے اک بندیا لا دتی سی۔
ایس میرے اندر دی خالص عورت دی خالص لکھاری نال کوئی لڑائی (پرخاش) نہیں۔ اوہنے آپ ای اوہدے توں پچھے، اوہدے پچھواڑے وچ کھلوتے رہنا قبول کر لیا ہویا اے۔ اپنے بدن نوں اوہدی نظراں توں چوری کردے ہوئیاں۔ تے شاید اپنی اکھاں توں وی۔ تے جدوں تن موقعیاں تے اوہنے اگے آنا چاہیا سی، تاں میرے اندر دی خالص ادیبہ نے پچھے ہٹ کے اوہدے لئی تھاں خالی کر دتی سی۔
خالص لکھاری دا روپ میرے نال رہندا اے۔۔۔۔۔ خیال وی۔ خواباں وچ تے ایویں اوہدی تے میری شکل اک ای بن گئی ہوئی اے۔ پر خالص عورت دا روپ میں صرف تن وار ویکھیا سی، سچ اے، پر اکھاں نال صرف تن وار ویکھیا سی۔ ایس لئی کئی وار حیران جئی ہو جاندی آں۔۔۔۔۔ اوہ کیہو جیہا سی؟ میں سچ مچ ویکھیا سی؟