الھڑ بلھڑ باوے دا ۔۔۔ راشد جاوید احمد
الھڑ بلھڑ باوے دا
( راشد جاوید احمد )
الھڑ بلھڑ باوے دا
باوا کنک لیاوے دا
الھڑ بلھڑ باوے دا
باوا رُکھ دے تھلے بیٹھا
نہ کوئی حرکت نہ کوئی واج
چپ چپیتا تکدا جاوے
گئے دناں دے سُفنے
بلدے بلدے جگنو جیہاں
دو اکھاں دے سفنے
الھڑ بلھڑ باوی دا
ڈاچی والی ٹور ٹریندی
رُکھ دے تھلے آن کھلوتی
موتیے رنگی صورت اسدی
لال نیں اس دے بُلھ
ست خوشبوواں، ستے رنگ
باوے اندر ٹھاٹھاں مارے
سدھراں دا شوہ دریا
باوا ڈھول وجاوے
رُت کنکاں تے آوے
باوے ہتھ کیہہ آوے گا
لوڑاں، تھوڑاں، پیڑاں
باوی کیکر چھٹے گی
سورج ڈبیا ہویا ہنیرا
پنچھی ٹر پئے گھر
باوی وی اک چھب وکھا کے
گئی پکھیروواں نال
الھڑ بلھڑ باوے دا
باوے اندر مچے بھانبھڑ
اگ بال کے
دھویئں دے پج رووے
بے وسی دے منکے گل وچ
چار چوفیرے نچے
تھک جائے تے
چپ چپیتا تکدا جاوے
بلدے بلدے جگنو جیہاں
دو اکھاں دے سفنے
Facebook Comments Box