تیرے عشق نچایا ۔۔۔ بلھے شاہ

​بلھا میرا مرشد

​ تیرے عشق نچایا

تیرے عشق نچایا ،کر  تھیا تھیا!​

تیرے عشق نے ڈیرا میرے اندر کیتا​

بھر کے زہر دا پیالہ، میں تاں آپے پیتا​

جھب دے بوہڑیں وے طبیبا، نہیں تے میں مر گئی آں​

تیرے عشق نچایا،کر  تھیا تھیا!​

چھپ گیا وے سورج، باہر رہ گئی آ لالی​

وے میں صدقے ہوواں، دیویں مڑ جے دکھالی​

پیرا! میں بهل گئی آں، تیرے نال نہ گئ آں​

تیرے عشق نچایا، کر تھیا تھیا​

ایس عشقے دے کولوں مینوں ہٹک نہ مائے​

لاہو جاندڑے بیڑے، کیہڑا موڑ لیائے​

میری عقل جو بھلی، نال مہانیاں دے گئی آں​

تیرے عشق نچایا، کر  تھیا تھیا!​

​

ایس عشقے دی جھنگی وچ مور بولیندا​

سانوں قبلہ تے کعبہ سوہنا یار دسیندا​

سانوں گھائل کر کے پھیر خبر نہ لئی آ​

تیرے عشق نچایا، کر تھیا تھیا

بلھا! شوہ نے آندا مینوں عنایت دے بوہے​

جس نے مینوں پوائے چولے، ساوے تے سوہے​

جاں میں ماری ہے اڈی، مل پیا ہے دھیا​

تیرے عشق نچائیا، کر  تھیا تھیا!​